Lirthei khalhtu polite lo ho hi

Khawpui zim te, ar hmai tiat lek, lun em em si kan nei a; kan la hmang lun em em mai bawk si a. Tunhnaiah 2wheelers taxi permit an pe thar leh nghal a, Aizawl khawpui kawng hian min zo ta ngang ta a ni ber.

Hetihlai hian Aizawlah four whee­lers aiin 2wheelers hrim hrim a tam zawk niin traffic police hotute chuan an sawi a, 60% vel zet hi ke hnih nei an ni nghe nghe. Chuvang chuan traffic jam-ah pawh an bang ta bik lo. Chutiang khawpa 2wheelers tam si, traffic jam nasa kar­ah polite lo tak tak pawh an kat nuk mai.

Four wheelers jam nghengin 2wheelers an lo jam ve mek a, chutah danin a khap tlat ang, double over­taking-in mi hman­hmawh leh mawl fal deuh chuan mi tam tak lo in line sa reng chu zak miah lo leh rem lem loin an tlanpel bawrh bawrh ṭhin.

Hetiang mi hi an ngeiawm mai a ni lo a, chep em em kar­ah hmaa lo dingte tlan pelh an tumna lamah intai palh a, mi pawisawi an awm chawk a ni. Hetianga tih ching ho hi kan traffic police lam hian mitmei deuh tawh se a ṭha hle ang. Entir nan Assam Rifles canteen leh Bazar Bungkawn inkar angah te hian line-a lo jam mek rem leh rem loa tlan pel thawt thawt an tam mai. An ninawm viau. Traffic police lam hian double overtaking hi vil deuh teh se.

Taxi pangngai khalhtuho lah hi lirthei dang a rawn tlan mek tih an hmuh reng pawhin kawng vang tan zawngin an lo inher ngei zel a, heng te hian kawng an ti tawt a, an polite lohzia leh a mawlna tilangtu ni maiin ka hria. Kawngpui hi taxi tan bik emaw ti tlat kan taxi driver zingah hian an awm. Taxi pu mawl zual ho hian mipui tan leh lirthei khalh ve tu midang tan harsatna an siam tam hle mai. Hengho pawh hi traffic police lam hian mitmei deuh thei tawh se a lawmawm ngawt ang. Kawng hi an ta bik a ni lo a, lirthei zawng zawng tana siam a ni si a.

2wheelers taxi pawh hi an la thar viau na a, an chuhhelh mah mah fo mai. An vai chuan a ni lo, chuhhelh fal bik an awm nual mai. Rate lah hi sorkar rate siam aia sang fe-a la ṭhin an awm nawk bawk. Hetianga rate bituk aia sang lutuka late hi hrem theih ni se a ṭha a, a hmangtute pawhin rate dik tak chauhin hmang se a duhawm hle a ni.

Twowheeler taxi zawng zawng an ni ka ti lo, duham fal an awm ṭhin a ni. Hei pawh hi a hmangtu mipui mawh a ni a, lungawi loh chuan STA-ah an number leh hmanna chin leh pawisa pek zat sawiin a complaint theih reng. Mipui tana thawk STA hian hma a la rap rap turah ngai ang.

- Lalthanmawia