Thingtlang khuate i harh ang u

Kumin chu kan ram inthlanpui kum a ni a, kan aiawha ding tur MLA kan thlang leh dawn ta a, thingtlang mite hian rilru fim puin, kan khua leh kan bial tana ṭha tur i thlang thiam ang u. Tam tak chuan ‘chu mi party chu a sorkar ngei a rinawm si a’ tiin kan bial leh kan khaw tana ṭha tur pawha kan rin lem loh, min chungtlak mai tur ang chite pawh kan thlang leh mai ṭhin. A then chuan vote thlak dawna Rs.100/- vel min petute pawh zuk thlang leh mai ṭhin a mawle!

Hetiang a nih avang hian kan khua leh kan bial hian hma a sawn thei lo a nih hi! Tun ṭum chu rilru fim tak puin, kan khua leh bial leh ram tana ṭha tura kan hriat chiah thlan i tum ang u.

Kan inthlang ngun ta hle a, sorkarna pawh a inthlak ngun ta viau a, mahse kei ni, thingtlang khaw mite hian kan changkan phah vak pawhin a lang lo.

Kan kal ngai rengin kan la kal a, a nihna takah phei chuan kan hniam telh telh zawk emaw tih mai a awl. Kan Minister-te leh kan thlan lal ngei kan MLA te lah biak an har em em zel a, kan khaw hmasawnna tur lam aiin anmahni hmasawnna lam an ngai pawimawh zawk emaw tih turin an lian thur thur a, keini kan cher telh telh a nih hi.

Thingtlang khua­te hian kan khaw hma­sawnna tur ngaih­tuah ve hi kan tih mak­mawh a ni. Thingtlang khaw­tlang ro inrelna leh thingtlang sorkar, kan Village Council tihchangtluna tih chak hi kan hmasawn ve na tur chu a ni. Tuna kan kal hmang angah hi chuan thingtlang khuate hi chu kan rethei tial tial dawn. Thingtlang ro inrelna tichangtlunga tichak tur ngei, inthlan manifesto a dah a, bawh zui ngei tur chauh i thlang teh ang u.

Kan thingtlang khua V/C-te hian mahniin an khuate ṭheuh hmasawnna tur plan siamin, an development sumte pawh budget siamin, sorkar hian lo pass sak ve sela. Chung an sumte pawh chu direct-in an kutah lo lut ve ngat sela chu tun ai em hi chuan thingtlang khuate hian hma kan sawn ang.

Hetiang an tih theihna tur hian secretary pawh term neia V/C-ten ruat mai tawh lo hian LDC emaw pek ni se, office nghet neiin, ni tin office ve ziah ṭhin sela. Mipui thlan tlin ṭheuh ṭheuh MLA leh V/C-te hi an inthlau lulai em a, V/C te hlawh pawh mumal zawk pek ni ve se.

Hetiang a nih ngat hi chuan thingtlang khuate hian hma kan sawn ngei a rinawm. Hetiang deuha ti thei tur leh manifesto a pawha dah ngattu party chiah thingtlang mite hian tun MLA inthlanah hi chuan thlan tlin i tum ang u. Chuti a nih loh zawngin kan inthlang zo chauh ang a, kan rethei leh tlawk tlawk dawn, kan thlan lalte lahin Aizawl chauh hi Mizoram emaw min tih san leh mai ang.

Chuvangin, thing­tlang mipuite hi i harh tawh teh ang u. Party lam atchilh a ruih chilh lovin kan hmasawnna tur lam i thlir thiam ve tawh teh ang u.

- Patrick Z, Chhingchhip