Sumin engkim a si thlu

Sum hian engkim mai hi a hneh vek an tih hi Mizorama kuhva ro dan lova tawlh luh nasa dan an sawi apianga ualau taka an hnial ta pang pang hian a tichiang ta ber mai lo maw?

Hman deuvah kha chuan an han sawi ve deuh pawh khan a tawlh ṭhin kha chu an tawmim ve deuh ṭhap ṭhin kha a nia, tunah hi chuan, "Enge a pawina? Kuhva kan tawlh a ni mai a, min thik vang a ni zawk," tiin thil dik lo taka titute lam hian ualau takin an hnial ngam tawh tlat a ni.

Kuhva chu ruihhlo a ni lova, chuti chung chuan dan lova lak luh hi chu dan bawh­chhiatna a ni tlat a ni. Chu chu kan mithmuh ngeiah ualau takin an kal ta chur chur mai a nih hi.

Vairengte khaw dai te chu Kudam hmun a chang zo tawh a, Kuhva kudam a ni ber tawh. Heti taka sumdawnna lian leh pawisa vir vel tamna hi dan loa tih a nih chuan check gate-ah hian lo hlin hmak hmak tur a nih lai hian an hling thei der si lo.

He thil hi a mak dan hi a ril hle bawk a ni. Police nei lo ang mai, Home Minister leh Minister dang nei lo ang mai, opposition MLA nei lo ang mai, Central YMA leh MZP leh MSU awm awm lo ang mai hian Kuhva tawlh chungchang thilah hian kan ngawi ta thuap mai a nih hi.

Hman deuhva Ruatfela Nu article khan dan lova tawlh hian nasa taka Mizoram leh a chhunga chengte a tih chhiat dan a sawi kha 100% in ka thlawp a ni.

- Lalremruata