Chhungkaw Chhiarkawp Dik Lo

Mi pakhat Englova hi a awm a. A naupan lai chuan naupang fel tak a ni an ti. Sunday sikul kal kim lawmman la zat zat, Sunday sikul exam-a mark hmu sang thei tak, naupang entawn tlaka sawi a ni an ti bawk.

Zirna lamah pawh nu leh pa tam takin an fate zilhna'n an hmang a. Zirtirtute pawhin chutiang taka mipa naupang fel leh lehkha thiam thei an nei chu an chhuang hle. Exam apiangin a tiṭha ber a nih loh pawhin a sang ber pawl a ni ziah a. Amah hretu apiangin, "Hei hi chu," an ti ṭhin.

A chhungte leh amah hretute beisei ang ngeiin sawrkar hna ṭha tak a thawk ta a. A awmna apiangah kohhran leh tlawmngai pawl hrang hrangin an um zui a; mi ṭangkai tak a lo ni ta.

Tv Englova chuan nupui fel tak, Pathian ṭih mi kan tih ang chi, kohhran ṭhalaia inhmang tak neiin chhungkua an din ta a. Tv Englova kha Pu Englova a lo ni ta.

Pu Englova chu a fate chuan kum sawm an tlin hma chuan an ngaisang hle a. Khawvel pa ṭha ber, thil tithei ber, fel ber, sualna reng reng nei lo hmuhin an hmu a ni.

Mahse kum a lo vei a, a fate chuan high sikul algebra an han chawh thiam meuh chuan an chhungkaw chhiarkawp chu an chawk dik thei ta hauh lo mai le. An in ropui tak te, an furniture to pui pui te, an motor nalh tak tak leh an khawsak phung hrim hrim chu an pa ber Pu Englova thla tin hlawh zat nia an rin hriat nen chuan an han belhkhawm a; pahnih leh pahnihah sawm a chhuak leh tlat ṭhin.

An chhungkuaa chhiarkawp dik thei lo chu chhung inkhawmnaa nu ber ṭawngṭai duah hluah te, chawlhni tuka pa ber Bible kuah chhuak ve ziah te chuan a tidik thei chuang lo va. Nu berin an chhungkuain Pathian malsawmna an dawn nasatzia a sawite chu Pathian malsawmna a ni tak tak leh tak tak loh an lo inzawt ve a; pahnih leh pahnih belhah pali a chhuak thei tlat lo. Kohhrana pa ber nihna leh a chawlhni zan sermon te chuan a formula a dik tawh miau loh avangin an chhungkaw chhiarkawp dik lo chu a tidik thei chuang lo.

Pu Englova nupui fanaute chuan an chhungkaw chhiarkawp dik lo chu a tihdik ngaihna an hriat loh avangin a pawmzam lamah an ṭuan ta a. "Mite pawh engmah an ni bik chuang lo," tiin an chhia leh ṭha hriatnain dik lo a tih chu palzam an tum ta a ni. A ṭhenin ruihtheihthil hmangin an rilrua inthiam lohna awm chu chul mam an tum a. A ṭhenin sum tam tak hmuh belha an kawng zawh lai chu zawh tlang law law an thlang bawk. Tichuan Pu Englova fate zingah chuan mi mak tih huai huai khawp mi inang lo deuh deuh an lo chhuak ta le. A ṭhenin damdawi ruih theih ngawl an vei laiin a ṭhenin kohhran ngawl an vei thung. A tuate mah chu an inngaihsan bik loh avangin a ruihtheihthil ti ber chu a chapo ber a, a nu leh pate hnenah a thil duhzawng a ngenngawl ber a, nu leh pate pawhin an tlawn ber emaw tih tur a ni.

An chhungkaw chhiarkawp dik lovin a fate rilru a nghawng dan chu Pu Englova chuan ngawi rengin a tuar a. Simin insiam ṭha dawn se a kal thui lutuk tawh a, engtia thui nge kir tur a hre tawh lo. A chapona tlang sang aṭanga chhuk lehna tur rahbi chu a zawh ngam tawh lo a ni ber a, ngawihah a tlak hmiah mai a ni. Pi Englovi erawh chuan a rilrua amah kam rengtu an chhungkaw chhiarkawp dik lo chu kohhran hmanga chawh dik a tum a; a hlim lui nasa. Zing ṭawngṭai a kal taima a, thawhlawm lamah a pawk a, a lâm taima viau bawk. A chang phei chuan an chhungkaw chhiarkawp dik lo chu Pathian khian a rawn chawh diksak tak tak nia hriatna neiin a inthlamuan chawp fo mai.

Chhûng inkhawmna-ah chuan an "dikna leh rinawmna" lam aiin "malsawmna" an dawn lam an sawi tam zawk a. Chuvangin an fate chuan dik taka sum thawh chhuah hi malsawmna a ni tih hre phal lovin sum hrim hrim hi malsawmna emaw an ti hmiah tawh. Chumi nghawng chu ram hian a tuar mek a ni.

Mahni rila rah fate hnena pawisa lakluhna dik tak sawi ngam lo; chhung inkhawmnaa rinawmna leh dikna aia 'sum malsawmna an dawn avanga lawmthu sawi tam zawk' Kristian nu leh pa fel tak tak kan ngah poh leh sum lakluhna kan duh tui lo mai ang.

- Lalchhuanmawia Tochhawng