Zan curfew hi eng nge a ṭangkaina?

Covid-19 vanga engmah ti thei loa kum hnih dawn kan buai hnuah hun harsain min la tlansan thei lo a. Hri darh kan hlauh vanga kan in khuahkhirh rei em avangin mipui kan mangang tawh a, mi tam tak phei chuan eizawnna lamah mamawh kan neih tam tawh avangin he hri hi hlauh enah pawh kan en phal tawh lo a ni ber.

Chutihlaiin Mizote hun pui Krismas a lo hnai leh ta hle mai bawk a, engtia awm nge kan tum tih pawh hriatthiam har khawpin Mizo mipuite dinhmun hi a chhe tawh. Eizawnna lamah buaina namen lo kan tawh avangin mitin kan chiai a, sum hmuh theihna remchang apiang kan bawh a ni deuh ta.

Hetiang dinhmuna kan din tawh avangin sualna te pawh a punlun viau ang tih a hlauhawm a, fimkhur taka kan in kaihhruai a ngai dawn ta niin a lang. Sorkar pawh hian curfew awmze nei lo lutuk te hi chu kalpui tawh bik lo se, hripui hi curfew leh dan awmze nei lo hmanga hnawh bo theih a ni tawh lo tih kan hre chiang tlang tawh tho si a, zan curfew te pawh hi hlih vat a hun tawh a ni.

Thil awmze nei loa kan intih buai reng chuan tun aia manganna thuk zawk mipuiin kan tawk ang a, dan palzuta thil tih a tam ang a, sualna a punlun ang tih pawh hlauhawm tak a ni ta.

Tun dinhmunah chuan sorkar hian thuneihna lantir nan zan curfew hi a hmang tel deuh emaw tih mai turin thil awmze nei lo lutukah zan curfew hi a puang tlat a, awmzia a neih loh dan leh hri darh leh darh loh nena a inkungkaih loh dan en hian a hlip ui ni ber te hian ka hre ṭhin.

He hri leng vang hian crime rate tlahniam te kan ti, ṭhenkhatin road accident a tlem thu te kan sawi a, a dik viau ang. Hetiang taka kan in khung chhung chuan crime rate leh lirthei chetsualna hi chu a tlem hle tur a ni reng a ni. Hei hian sorkar chet ṭhat leh chet chhiat lam a kawk lo a, engmah ti thei loa kan in khung beh vanga him mai chauh kan ni e.

Accident te, sualna punlun turte hi dan leh thupek hmanga khuahkhirh tur a nih laiin tunah chuan hri leng denchhenin thuneihna kan lantir a, thil ṭul lo leh hma­sawnna dal tlat thilah curfew hmang te in mipui kan in khurhkhirh mai mai ni berin a lang tawh.

Zan curfew bik phei hi chu awmzia a nei em tih han chhut ila. Chhun lamah duh tawkin kan zi mur mur a, traffic jam awm lohna khawpui neih kan tum mek pawh tibuai khawpin motor kal hleithei lo khawpin kan chhuak nasa a. Bazar leh hmun lunlai apiangah traffic a jam nghal zel a, picnic leh inkhelhna lamah pawh ni se engmah timna a awm tawh lo, kan duh chu kan ti thei vek tawh.

Hetihlaia zan lam eizawnna tibuai khawpa curfew kan la thlahdul duh tlat lo mai hi eng rilru nge kan put tih hriatthiam a har ta khawp mai.

Eizawnna kan ngaih pawimawh loh chuan nakinah a tuartu tur chu mipuite tho hi kan ni dawn tho tih hria ila, ngun taka ngaihtuah pawh ngai loin zan curfew hi hlip tawh teh ang u.

- Lalpekhlua