Zaktheilo

Mizo ṭawngah hian thu chiang fek fawk hi a awm nual a, chu mi zinga kan lam rik tam ber chu 'zaktheilo' tih hi a ni. Zaklo tih ringawt aiin zaktheilo tih hi a tum a la chiang lehzual a, Mizo ṭawng hau­sakzia pawh kan hriat phah a ni.

Hman deuhvah kan vengah rukru pakhat an man a, khawtlang hruai­tuten kawnah an din tir a, an dawp a. A ṭhenin kut an han thlak deuh ṭhat ṭhat pawhin chu rukru chu a zam duh miah lova, a ruk loh thu hruaisen takin a la au pui ngam a ni.

He rukru hian amah kutthlak­tute chu, 'Ka pu, cheng nuai tam tak ei ru pawh in man ngam lova, kei hi thil man tlem te ka ruk ni miah lova min puh vangin kut min thlak hi mi rethei kan nih vangin min hmusit a ni,' tiin a chhâl hrep mai a, nimahsela an dawp leh fe hnu chuan a ruk ngei thu a in sawi ta chauh a ni. A lo zaktheilo viau a ni.

Hetiang mi zaktheilo deuh hi Mizoram politician zingah hian an awm tlat a ni. Eiru hrep tawh, dik lo taka khawsa hrep tawh, sum leh thil­tihtheihna (power) neih avanga mipui thuhnuai em em mai anga inngai, mipui zahpah miah lo leh duh duha tâl thei anga inngai politician hi Mizoram hian a lo nei tawh ṭhin a ni.

Tunah pawh hian Mizoram hian hetiang mi, mi zaktheilo hi a nei leh mek tawh tih chu kan hre leh ta ṭhup mai a, a tawp a tawpah chuan hun kal zel hian a dawp a dawp ang a, a la puang ve leh tho tho vang.

Corruption a inhnamhnawih tiha puh hran pawh ngai lova an in leh lo, an car leh an thil neih aṭanga hmuh mai theih te hi zaktheilo takin an khawsa ngam asin! An fate pawh Vairama sumdawng liante nena danglam lovin an enkawl thei a, an zak miah lo.

Khehpuam tia rinhlelh rawn ṭhap mai, an kheh leh kheh loh finfiah theih si loh, puipun leh media lamah pawh kan hmuh awl loh mihring an awm leh bawk a, heng mite pawh hi mi zaktheilo tho an ni. Mi zaktheilo kan ngah tak avang hian kan ram hi a la buai lovang tih a sawi theih loh e.

Sorkar phal loh thil tawlhru duh mi ṭhenkhat rangkachak a ni emaw phal loh kuhva rah tawlh avanga in siam lian zaktheilo tak tak kan nei ṭheuh bawk a, nakin ah chuan hunin a la puangzar leh tho tho dawn.

Zaktheilo hle mahse heng mite hi chunglam leh hun hian amah hian a lo dawp a lo dawp a, a tawpah chuan a la puang mual­pho thovang, mi zaktheilote tuallenna ramah kan ram hi kan chan tir zui zel dawn em ni?

- RK Thansanga