Lirthei ri ring

Hman deuh khan traffic lam thununtu kan police-te kha lirthei, a bikin ke hnih nei ri ring kha an duh lo a, mante pawh kha an neiin ka hria. Strict chho zel tura ka beisei nen, khangte kha tunah chuan thawnthu hlui a ni ta der mai.

Two wheeler tam tak hi a exhaust pipe an thlak a, ṭhenkhat chu a ri a ring hle mai a, two wheeler-a chuang ve thote tan phei chuan an ri a rin avangin tlan a nawm loh phah hial thei. Hnung lama an rik vut vut tawh chuan thlamuangin a awm theih loh a, hnung lam vengthawng takin, rilru bet lo takin kan khalh a, chetsual leh intihpalh a hlauhawm duh hlein ka hria.

Zan reiah hetiang bike ri ring chiho hi chak deuh deuha tlân ching ching an ni leh­nghal a, kawngpui kama awmte tan chuan an ninawm duh hle. Damlo na deuh nei tan phei chuan an huatthlala awm thei khawp mai a; kawtthlerah helicopter an hnuk ta emaw tih mai tur a ni. Mihring hriselna atan pawh hian a ṭha loin a rinawm, noise pollution siamtu lian tak an ni.

Bike ri ring zing­ah rau rau pawh bullet bike ang chi ho, ri ring phei hi chu a nghawrin min nghawr dur dur mai a, kawng bula in nei tan phei chuan tukverh darthlalang a nghawr dawt dawt thei ṭhin. Bike ṭhenkhat rik rin dan phei hi chu a makin ka hria; mahni zawnah hi chuan ri ring vak lo angin a lang a, a hla tial tial a, a ring telh telh emaw tih mai tur a ni.

Traffic police lam te hian bike ri ringte hi kawngpui dunga an tlan pawh hian an en liam thei ngawtin ka hre ṭhin. Heng bike ri ring ho hi khuahkhirh deuh se a duhawm hle mai.

Hriselna atan a ri ring lutuk hi a ṭhat loh theih mai piah bakah, lirthei khalhtu dangte tan a thlamuan thlak loh a, hnung lama an tlan phei hi chuan min tur deuh angin a lang. Tum vang reng ni loa tlan chak phah a awl khawp mai.

Mipuiten kan duh ang anga kan lirthei ri tihdanglam kan tum ta anga lang hi thuneituten hetiang lam an bengkhawn loh zawng tak a nih vang te niin alang. Police zingah ngei pawh hian bullet ri ring chi nei an awm nualin ka hria; eng police ber nge tih erawh sawi mai theih loh, police form ang ha ve ul si, ṭhut puak ring zet hi ka hmu fo a ni.

Kan him tlanna tur te, kan thlamuan tlanna turte hi thupek kengkawhtu lam hian kan ngaihpawimawh a ngai hle. A mawi­na te, a rik pa-na ringawt­te ai hian mipui vantlang himna tur leh ṭhat tlanna tur ngaihtuah hi i ching teh ang u.

- Ramropuia