Two Wheeler double overtake

Tunhnaiah Vanglaini chanchinbuah two wheeler double overtake chungchang article ka hmu ta zeuh zeuh a, midang pawhin an lo vei tih ka hriatin ka lawm hle. Tun hma aṭanga ka vei tawh a ni. Helmet khum ṭha peih lo tak tak leh, hmel ena balh hmel fe fete hian an ching zual hlein ka hre nghe nghe.

Traffic a lo jam deuh a, va inzeh luih chuan a jam nasat belh ang tih hlau taka kan lo din ṭhap laia inthlahrunna nei reng reng lo ni awm tak maia lo intlat ṭhap mai rawn tlan pela va inhnawh luih tum, traffic ti-jam nasa belhtute hi traffic police-te pawh hian dim lo zual deuh teh u. Lo intlarte hnung lam daiha nawr let tur hian traffic police-te hian lo ti ṭhin se ka ti hle ṭhin.

Two wheeler-ten motor dang tlan pelin, inzui diah diaha an kal lai leh, lehlam aṭanga chutiang bawka an rawn kal laiin, hmanhmawh chhan nei lo tur ngawih ngawih si, polite lo tak taka midang overtake leh kher an awm ṭhinte hi kan khawpui kawng chepah hi chuan himna tiderthawngtu an ni. Double overtake chingte hi chu man hmak hmak ṭhin se kan traffic police-te revenue hian a sân phah hle ang a, department tan pawn hming ṭhatna tham a ni ang. Chu mai bakah mipui leh lirthei khalhtute kan him lehzual dawn a ni.

Kan kawngpui a chêp avang te, chhungkaw tam takin hmun kan neih tâwk loh avangtein two wheeler hi kan leklam tial tial dawn. Traffic police-te hian ṭan an la viau nachungin mawl tak tak hi an tam belh zel avangin khawpui chhunga two wheeler tlan dan hi a mumal lo tial tial mai. Mihring tan pawn a hlauhawm tial tial a, lirthei khalhtu dangte pawn fimkhur loh vang ni loin chetsual theihna a tam tial tial. Hetiang hi a nih avangin traffic police-te hian ṭan la lehzual se ka duh hle a ni.

Rush hour lai phei chuan two wheeler-in motor a tlan pelh mek laia two wheeler dangin a rawn lehpelh a tum leh chhawng hi a hlauhawm lehzual. Tin, hmaa tlante tlan dan ngaichâng lek loa tlan pelh bawrh bawrh tum kan awm fo mai hian himna a tiderthawng lehzual. Two wheeler-in a hmaa motor tlan lehpelh a tum mek laia a hnung leha two wheeler-in a hmaa two wheeler tlan ngaichang lek loa rawn lehpelh a tum thut avanga chetsualna ka hmu fo tawh a ni. Kan traffic police-te hi han ṭang deuh teh se.

- Lalkhawngaiha