BEIH HLAWH - HLAWHFA ṬHA

Kamkeuna: Mizoramin Governor thar kan nei a. A lakluhnaah MNF party-a mumal ka tih ber Pu Lalruatkima leh Congress party-a mumal ka tih ber Pu Zodintluanga te selfie lai midangin an lo lakchhawn leh thlalak chuan Mizote khawvela Social media a luah hneh hle.

A mimal takin Pu Zodintluanga leh Pu Lalruatkima te hi chu tling deuh reng mai se, tiin mipui pawhin kan duh vekin ka ring. Kei ngei pawh hian ka duh em em zinga mi an ni. Ram leh hnam hmasawnna turin an inzir peih em mai. Amah Pu RKa te hi a fawng vuantu lamah ṭhuin, a suangtuahna a taka hlen thei tur dinhmunah ding se, hnuk-ulh meuhin a hmalakna hi Mizoramte chenna hmuna mite hnena chhiar theih tura ziah a chakawm.

Uai-in ṭha mi
Kan ram roreltu ka hmuh phak ve, an chanchin leh hmalakna ka hriat phak ve chinah MNF lamin an tuipui fal leh an ngaihsan deuh bik Pu Zodintluanga leh a hmalakna hi ka ngaihtuah a. Ani ang minister mumal deuh hi Congress hian nei lo se chuan Congress hian thil ṭha tihchhuah leh thawhchhuah tur an nei tlem sawtin ka ring a, MNF tan tak pawh a khawhar thlak duh phian ang.

Mi inzir peih, Chanmari Veng ang maia thil tha leh thil thar dapchhuah tur ngaihven reng mai, mi hnuaihnung berte ngaihdan thlenga ngaithlaa chhawr ṭangkai thiam hi hei aia tam neih a chakawm.

A hnuaia officer leh tirhkah thlenga an pawimawhna hriaa hmang thiam em em a nihna hi a ropui. Ka tehkhin ber chu Bible in 'Belvawtu ṭha' a tih kha. Kan ram roreltu kal tawh leh kal mekah hian mumal vak lo, anmahni awp khawmtu minister awm lo mah se hetiang dinhmun hi chu a department hian an thleng tho ang tih tur khawpa ṭangkai lo, hmasawn belhna awm lem lo, engmah ngaihtuah chhuak lem lo, a awm sa ring tam tak an awm ṭhin. Thil ṭha, thil thar, mahni chanpual ziahna bu hi nei ṭheuh se, hmalakna thar tha ziah tur a ngah bik hian ka ring.

Hetiang khawpa minister mumal a nih lai hian a tel miah lohna tur hminghliauna ang chi-ahte hian tel ve lo mah se rin luh hram luih hram hram zel a ni a. Kan inchawimawi dan hi a danglam ṭhin teh e.

Pathianin ngaihtuahna leh hriatrengna tur thluak duhsak taka min pekah hian theihnghilh mai harsa khawpin hna a thawk nasa in a thawk ṭha in tih hi hla phuah thiam tan chuan hlaa phuah chur chur tham a ni.

Zep nak emaw, a nihna tak sawi ila, Pu Zodintluanga hian MNF ministry-in an hlawhtlinpui loh, Contractor hlauh avanga an hlawhchham pui, an pamṭul tak GAWSS phase II (Greater Aizawl water Supply Scheme) pawh PHE Minister a nih aṭanga rei loteah peih fel a ni a, Aizawl khawpui km 234-a zaua cheng mipui 2'93,416 chuangte chawm turin Tuikhuahtlang-ah an pump haw pur pur ta mai a. Keini mi in hnuai luah, mi tawlailir leh an bur ruak awl lai chuha zan rei mi mumang neih huna tuikhur lama tui chawi ṭhinte pawhin zan reia tuichangral tura bur ruak tawlailir-a nawr rik rum rum lam chu kan hawi san a, hei ngawt pawh hi nuam ve tak a ni. A hoa PHE hmalakna hlawhtling tak zar zova tui chawi bansan hi party ding thar member ai pawhin an tam hial a rinawm.

Tunah hian GAWSS phase-II hi kan kham khawp loh tak deuh avang in Phase III buaipui leh mek a la ni ta deuh deuh nia. He ti a nih phei chuan Aizawl khawpui chuan tui duhtawkin kan nei tawh dawn a, tui pek hneh loh vanga in sak rinhlelh kai deuhte pawh a zia sawtin a rinawm.

Khelmual tha leh Mizo mipuite hlimna

Football avanga Lammualah Mizo mipuiin kawrsen haa Khelmual ṭha duha sawrkar kan au(h) ṭhup ṭhup lai kha tunah chuan Pu Zodintluanga Sport minister a nih hnu hian thawnthu emaw tih tur a ni ta. Khelmual diak leh ṭhutna hrehawm tak hre phak lo hi kan tam tawh ngawt ang. Lammual diak kawi tak leh ṭhutna tur mumal lo takte kha a ngaihawm lehling e. Khatiang hun kha kumin Chapchar kutah khan Chanmari YMA in an rawn changin khelmual ṭha te, infiammi hlawhtling an lo chhuah tak zawih zawih dan hmuhnawm tak an rawn entir nghe nghe kha.

Khelmual ṭha chuan infiam mite bakah mipui mimir hlimna a rawn thlen a, party tin mai chu khelmual ṭha chhungah hlimin kan au a, nula leh tlangval, nu leh pa, naupang chenin khelmual ṭha thlalak chuan kan social media Facebook, WhatsApp leh Instagram a luah a, heng kan ṭhalaite hlimna thlentu khelmual ṭha, kan profile picture-a Lammual hring dup leh ṭhutna nuam takte hi MNF ministry-ah khan neih tumin Lammual leh complex-ah phul chi theh a nih thu chuan Mizoram chanchinthar a luah a nih kha.

Kha phul-chi kha a sirah khawhar takin tlem a ṭo ve a, a ṭo chhunte kha an khawngaih thlak zawmah e, ni a lo tlangsang a, anmahni mai kha chuan Lammual an mawi zo dawn chuang loa, khawvel aṭangin an bo zo ta reng a ni.

Khatiang Lammual diak kawi tak, ṭhutna mumal pawh awm lohna, phul-chi theha tihhrin tuma pamṭul san tak kha Pu Zodintluanga a rawn minister hnu hian infiam mite bakah inchei mite, zai mite, film siamtute, thlengin an lawm a. A kal peltu nih ngawt pawh kan inchhuang ar mai theuh a, hei hi, khu khu, saw saw tiin infiamna hmunhma nuam tak tak Kan neih te chu nuam ti takin kan in kawh-hmuh ta thei ta. Lammual-ah grass a rawn phah hring dup a, gallery nuam tak leh a chungte nen lam, zanah Europe khawmuala mite angin inkhel kan en ta hem hem mai a nia.

Chutah Rajiv Gandhi Stadium lam a hawi a, Mualpui lam hawi ila chu stadium chuan lung a va ti awi tak. KṬP, YMA, SAY, PYD, ṬKP thlengin chu lam chu kan hawi a, chumi hmunah chuan kan vanglai hun hlim takin kan hmang hlawm ṭhin a nih tak hi.

District tinah khelmual ṭha, hring dap mai a siam deuh vek bakah mipui ten tui an hnianghnar takin an nei ta bawk.

Tih theih loh ti thei

Aizawl khawpuia a hmalakna chauh pawh hi thlir ila, a hmuhnawmin a ngaihnawm e. Nitin kawtthler hian hma a sawn a, a danglam tih ngam a ni. Kawng pawimawh junction zauh hna a thawh engemaw zah zingah MNF ten Bawngkawn ram mipui tana ṭangkaina awm si loa nuai 150 teh meuha an hralh tawh chu lei let lehin Bawngkawn junction chep lutuk kha zau nuam takah an siam leh a. Saw kawng zauh avang sawn mipui harsatna tam tak a kiang a, kawng zau, nuam leh mawi tak kan lo nei leh ta reng mai. Nakin lawkah chuan Bawngkawn junction zim leh hahthlak tak, mipui harsatna tam tak thlen thin hi a awm ngai a ni tih hi ṭhangtharte chuan an hre loin kawng nuam tak nei sa ah an in ngai leh thuai ang.

A hmalakna nasa tak avang hian hriatreng pawh a hlawh tawh ang a, Congress vuak hniam tum tan chuan amah beih hi tihawm tak pawh a ni e. Hmun tinah a hming ziak tar lo mahse hna ṭha tak a thawhte avang hian hriat reng a hlawh ang. Amah ang hi panga tal nei ila Mizo atanga Israel hnam Bo nih tum tlatna thlarau sual pawh hi kan um bo tawh hial ang.

- Lalrochhara Chhakchhuak