Kan ram hi thlir chiang ve teh

Mizoram hi ram nuam leh boruak pawh thiang ṭha tak a ni a, leilung pawh a ṭhain thlai chitin chin theihna a ni. Tlawmngai leh thianchhan thih ngam leh huaisen kan ni. Lal neiin kan intodelh ṭhin hle a, khawvel dang kan ngai loa awm ṭhin kan ni.

Rambuaiin min nuai hnuah central politic leh UT sum tam tham takin min nuai bawk. Drugs-in min run a, zu leh ruih theih thil chi hrang hrang a lo hluar zel a. HIV (AIDS) leh cancer vangin kan thi phuk phuk a, rukruk leh ei ruk a hluar a. Party pahnih an inlal chhawk a, Party mite duhsaknain an khat tlat zel a. Ei leh barah kan intodelh lova, kan kawng a chhia a ni.

Chutah kan ram chhungah ngei Foreig­ner Chakma District a lo awm a, Inner line Forest reserved lah Cachar lam lakah kan chan mai tih a hlauhawm ta.

Tunah pawl thar lo piang te leh MPC party leh ZNP-te nen ṭangrualin ZPM-ah chunglamin min hruai khawm ta a. ZNP leh MPC hi chu party awm­sa an ni. MZP leh kan thalai ten Chakma leh Inner Line reserve an vei thar zual pawh hi chunglam hnathawh bawk niin a lang. ZPM a lo sawrkar chuan Chak­ma District Coun­cil lo piang pawh hi, dan dik hmanga thai bo a ni ang a, Inner line reserved 509 Sqkm pawh hi kan sawr­karin dan angin a la let leh thei ngei ang.

Sangha leh sa lam chi-ah hian thla tin state dangah cheng nuaih hlir 2200 vel kan hmang a, tel, chini bawnghnute lam leh eichawp thlai lei nan, thlatin cheng nuaih hlir 2400 vel kan hmang bawka chhut a ni.

Heng te hi central aṭanga sum lo kal leh kan state sawrkarin ran chi hrang hrang vulhtu leh vulhna hmun district tinah a siam ang a, tlem te te leh, a note sem zeuh zeuh ni lo, ṭhatpui tham kan vulhtir ang a. Chung ran ek leh a sawngbawl dan leh thlai chawm nana hman dan thlengin sawrkarin a kaihruai ang a, tun aia let tam takin a hlawk dawn.

Cheng nuaih tam takin mi rama mi lei lovin kan ram thar ngei kan lei dawn a, kan intodelh vat dawn.

Sawhthing hi sawr­karin Kg-ah 40 aia tlem lovin a lei ang a, hmun phiah ro pawh hi Kg-ah 100 dawn laiin a lei ang a, sawrkar a lo hek deuh pawhin kut­hnathawktu an din­chhuah chuan a lawm­awm zawk dawn a ni.

Kum 30 vel kal ta aṭanga kan sawrkar hrawn ṭhinte hi chuan kum li vel vitamin min pe zeuh zeuh a, a kum 5-na inthlan dawnah nachhawkna chak deuhin min jection a, tlem tea tih lungawi theihin min dah reng mai a nih hi.

Tuna kan hmasawn danah hi chuan Presi­dent rule-ah pawh awm ila, tun ang tluk hi chuan hma kan sawn tho ang, an ti a ni. Mizoram changkan dan leh Kristian ram ni si, kan boruak inher dan leh mi tam tak taksa leh thlarau lam hmakhua han chhut neuh neuh hian thaw a ipik a ni. Kum 5 dang chu Babulon salah i tang nawn leh tawh lovang u.

- Khualluna Pautu