Sorkar kal fimkhur tawh se
Mizoram hi mahni intodelh lo state kan ni kan ti ṭhin a, a dikna viau mai. Central hian kan state sum tur hi min la tum sak deuh vek zel a, keini state thawh ve chhun hi a beitham hle a ni.
Chutih laiin kan mamawh tak tak ni chiah lo sum khawhralna ang chi board hrang hrangte pawh hi kan nei thluah reng tho niin a lang. Tin, department hrang hrangah pawh hian loh theih loh ni lem lo, sum siamna remchang leh kan mi duhsak zawngte hna pekna remchang a nih vanga post siam a awm nual a ni.
Heng zawng zawng hi sorkar hian ennawn se, kan mamawh ngei te chauh lo ni chu chhunzawm loh emaw hna lak belh tawh loh zawng te pawhin ṭan la se a duhawm hle.
Covid vangin kan sum hmuh ve na te tham te te, eichawp dap leh dawr kai tenaute chenin a buai ta viau a, hetiang sum hmuhna te tham tak takte hi hri vanga kalpui theih loha a han awm chiah hian a lo pawimawh ve zia leh mi harsa zawkte ei chawp hmuh theihna thil tam tak a lo ni reng a ni tih a lang chiang viau a ni.
Project lian leh ropui deuh deuh hi kan ṭangkai pui ber lo, thil ropui tak ni thei tur te hi tunah chuan a nih tur ang ni thei lo a awm ta nual mai. A ṭangkaina sawi tur awm lem si lo, khawl lian leh manto deuh lei a, cancel hleih theih tawh si loh ang chi project kalpui ṭhin te hi a awm nual tawh a, hetiang pumpelh tur hian ṭan lak a ngai.
Pawisa tam tak kan lo invest tawh, tha leh tui kan lo tih tawh zawng zawng hi lak let theih a ni lo a, a nih nih a ni zo tawh, hei chu kan tih theih piah lam a ni. Kan tih fuh lohah in zir ila a tawk mai. Mahse thil thar leh hna thar ṭul mang lo siam belh ang chi hi Covid vanga sum harsatna namen lo kan tawh hnu pawh hian a awm leh fo mai a, heng hi tih tawh loh tawp tur a ni.
Kan state budget aṭanga investment kan lo tih tawh pawh nise kan ṭangkai pui loh te leh tih chhunzawm loha buaina awm lo tur ang chi hi chu tihtawp ngam a hun a. Kan phak tawk te te a kal thiam hi sorkar hian zir ve tawh rawh se.
Uluk taka thil zir chian hnuah chauh ti se tawh ṭhin se, eng thil mah risk tawh lo se, reserve nei rana ruahmanna nen thil kalpui nachang hriat a hun e.
- Lalvohbika