Tuirial by election ah BJP AN HNUNGTAWLH LAIIN , PARTY PATHUMIN HMA AN SAWN
Iindia ram party lian ber leh member 28 Crores vel zet nei mek anga ngaih BJP chuan Mizoramah hma a sawn hleithei lo. Tlangram hi Lotus par hian a ngeih ngang lo nge, a enkawltu lam thiam loh zawk ni ang le!
Kum 2013 election khan BJP hian vote share 0.6 % vel a nei a, kum 2018 election khan 8% deuhthawah chho dawrhin MLA pakhat a rawn nei ta hial mai. Mi ṭhenkhat ngaihdan chuan Central lama an chakna zarzo chho thei leh next inthlan leh a Coaliation partner ni thei hial turah an ngai hman hial.
Mahse, tun hnai chhoa an dinhmun enin beisei sanpui an harsa ta viau mai. Tuna an President hnuaiah hian tlak hniam lam an pan zar zar mai. Nikum lawka LADC inthlanah BJP hi sawrkar lai an ni chungin MDC pakhat an nei hram a, Serchhip bial by election-ah vote za chuangin Election hmasa an phak lo va, Tuirial bialah Party dang zawngin hma a sawn vek rualin vote zahnih chuangin inthlan hmasa an phak lo leh bawk. BJP President hi an party chhungah thawhpui thei lo an tam hle a nih hmel a, he'ng avang hian nakkum MADC inthlan hma hian Central lam hian an rawn siamṭhat mai a rinawm hle.
Tuirial bialah hian, Congress chuan pathumna hniam tak ni chunga bul ṭanin inthlan hmasa lama an vote hmuh an khum hial a, anni ang bawk hian ZPM pawhin hma an sawn tho bawk. MNF chuan rinlawk ang tho ni mah se, beisei ai maha sangin hnehna an chang a, inthlan hmasa an khumna leh ZPM nena an vote diffrence pawh a sangin 1200 chuang zet a ni bawk.
Tuirial bial by election hian 2023 Gen election a nghawng tura ngaih a nih rualin, sawrkar hian kum hnih zet hun a la nei a, invawrh sang sauh thei a nih rualin tlahniam thei pawh ni thovin a lang.
Party lian pathum hmasawn vek karah hian ZPM hmasawnna a hniam ber a, a dawtah Congress an ni. ZPM bik hian, mipui khawngaih vote dilin, an MLA boral tá ralna nipah fawma vote tura mipui an sawmna aiin ruling thiltihtheihna boruakin mipui ngaihven a hlawh zawk tih a lang thei.
Tuirial bial MLA thar hian, an MLA boral tà Pu Andrew-a hmachhawpte tihpuitlin a nih tur thu leh Serkhan lama Football Ground phei chu MLA boral ta hming puttir hial a duh thu a sawi a, Candidate vanduai ta pahnihte pawhin Link road laih chhunzawm leh bial mipui tana din chhunzawm tlat an tum bawk. Heng bakah hian, Sawrkar lamin SEDP nakkum lama mipui hnen thlentir an tiam bawk a, Tuirial bial mipuite tan chuan ruling MLA nei bawk chunga thlamuantu tur pahnih dang neih belh bawk leh, Cheng nuai thum rim nam rum rum bawk. Lawmna leh thlamuanna lam thu hlir hriat tur awm ta hi a thlamuanthlak hlein a rinawm A tak ram thleng hlawm tak ang maw le.
- VL Huma