JOINT NGO TOTAL BANDH NEIH TUR KA THLAWP E

Total Bandh leh mahni inhrek zawnga sorkar nawr hi ka thlawp ngai lo khawp mai a. Mahse Lungleiin RT-PCR Lab kan neih ve na tur min din sak hreh lutuk avanga kawng awm zawng zawng mipuiin kan zawn hnua sorkarin chhuanlam siama a muang thei ang bera min kalpui avanga Joint NGO in Total Bandh buatsaih a tum hi awm ka ti ve ngawih ngawih tawh a, ka thlawp a, Lunglei mipui zawng zawngin kan thlawp hle a ngaiin ka hria.

Kan hriat hnu vek mah nise han sawi nawn leh teh ang. Nikum hripui len tirhah Opposition MLA pakhatin RTPCR khawl a donate a. Chu chu MNF sorkarin hman a tum lo. MNF Party worker tam zawk chu RT PCR kan mamawh loh zia leh RAgT leh Truenat kan neia a tawk an tih thu tai pawng zawrh zawrh khawpin an au a nih kha. MNF MLA (an hminghmerh chuan la sawi lo mai ang) ṭhenkhat lahin Social media ah Lungleia RTPCR khawl tur US ami chah mek anih thu te sawiin Civil Hospital hnunga RT PCR lab dinna tur hmun te an en thul. Tih tak takna a awm loh avangin vawiin thlengin nikum MLA Drama ho kha hlawhtling a awm lo tih hretu te kan ni

Lunglei Ṭhalai Pawlin hma a la a, kan pawl lian leh zahawm ber Sub Hqrs YMA Lungleiin hma a la a, RT PCR Lab for Chhmbial pawl hial a piang a. Nasa taka mipuiin sorkar kan nawr chungin sorkar a ngawi tlat a. Loh theih lohin High Court ah mipuiin sorkar kan nawr a, kan la chak zui. High Court ah sorkar ukil ten Lungleia RTPCR lab din an tum loh thu leh Lunglei mipuiin kan mamawh lo tiin min la hek zui. High Court erawhin mipui dinhmun hriain dik takin ro a rel a, sorkar chu Lungleia RTPCR Lab din turin thu a pe a. Sorkar erawhin muanchan chhunzawmin hma a la lawk lo a, court thuzahlohna Contempt Case te hial ngaihtuah a ni chho ta a, kan officer liante an inhambuai chho mek a ni.

High Court nawrna avangin sorkarin Tourist Lodge ah RTPCR lab din turin hma a la chho a. Sub Hqrs YMA leh Joint NGO te chuan thuchhuah siamin October thla chhung ngeia RTPCR lab Tourist Lodge ami peih fela run turin sorkar a nawr a. October thla a han ral a, civil work zo mahse tih tur tam tak sorkarin a hlamchhiah a la awm avangin Joint NGO chuan Total Bandh neiha sorkar nawr turin thu a ti tlu ta a ni.

ENGVANGINNGE RTPCR LAB HI KAN NGIAT?
RTPCR politics a kai luta kan hriselna, kan thih leh dam inkar hmanga politics khelh hi mipuiin kan duh lo. RTPCR hi Covid 19 damdawi a ni lo ti tein MNF MLA leh Sub Hqrs Lunglei GS te meuhin an thusawina leh social media ah an au pui lung lung a. Kan hre vek. RTPCR lab hi Covid enna chauh a ni lo. He lab hi kan neih ve chuan eng Pandemic pawh lo thleng se future ah screening test a ready thei tawh dawn a virus lam chi reng reng a bikin SARS natna ho ti mai ang. Tun a a langsar kan mamawh ah chuan Hep C ho genotyping leh quantitative test, chubakah HIV, Tin, MDR TB (Truenat an siam chhuah phah nachhan) MDR = Multidrug resistance TB leh thil dang tam takah kan la mamawh dawn ani.

RTPCR Lab hi chhim lam health infrastructure tih hmasawnna atana thil pawimawh tak a nih avangin mipui hian kan duh ve a ni. Sorkarin heti khawpa hriselna kawnga inenkawlna hmanrua min tih changtlun sak hreh hi kan vote chauh duh, hmasawnna tak tak min thlen tum lo hmuhin mipuiin kan hmu tawh a ni.

Heng thil zawng zawng sorkar chet dan leh chhim lam min hlamchhiah dan ka hriat zawng zawng avangte hian Thawhṭannia Joint NGO in Lungleia Total Bandh buatsaih an tum hi ka thlawp hle a, sorkar avanga mipui kan inhrek angai ta mai hi a lungchhiatthlak tak zet a ni.

Mipui mimal tin hian right kan nei a. Chu right chu sorkarin emaw mi thiltithei tu emawin min rahbehsak ṭhin hi thleng tawh suh se. Mipui hmasawnna tur ruahmanna reng reng hi mipui ta bawk a ni.

- GBR-02