Mizo ṭhalaite leh UPSC

Tun hnai mai khan he chanchinbu Jt. Editor, Pu Tetea Hmar nen Tv lamah inkawmna hun kan nei a, hun te a tlem deuh avangin duh ang pawh kan sawiin, kan inzawt kim hman meuhlo. Ka rilru a ka lo vei ve , sawi chhuah ka lo chak ve em em ṭhin chu ka'n ziah belh ve pawp ang a, mi nuih kan ti za em lovang chu maw.

Tun hnaiah, mizo ṭhalaite UPSC exam kan tlin theih loh em avangin demna a nasa hle a, a dem duhtu tan pawh ṭanfung ṭha tak tak a awm ngei ang. A mawh lo ve, Chakma leh Tuikuk lamin zirna ah theihtawp an chhuah a, UPSC a rawn tling nawlh te pawh an awm. Rual el tan leh kan hnam hmangaihtu tan chuan ṭan lak kan ngaih zia sawi hi an tih makmawh ve ani. Mizo, IAS/IPS/IFS kan tlem tial tial te hi a veitu tan chuan mut mawh hnar mawh tham a tling hial ta ve ang. Ṭhalai, hemi kawng a insawrbing mek te beng harh tu ni sela, ṭan la lehzual tura fuihtu ṭha tak han ni thei hlauh se a ṭha tur.

Amaherawhchu, kan ṭan luat ah kan ṭang ulh ta lutuk a;rilru na leh hrehawm takin mi tam tak kan siam ve bawk tih hriat tel erawh a ṭha hle mai. Engtik khawtik ah mah UPSC chu sawi loh, MPSC pawh exam lo tur ṭhalai tam tak an awm ve bawk a;eizawnna mamawh an ni ve tho si. Ṭhenkhat in an hmelṭhatna leh piannalhna hmangin eizawnna kawng an dap a, ṭhenkhat Pathian in a pek zaithiamna hmangin, mi lûnglen an lo hnem bakah, Pathian fakna in hun an lo hmang ve bawk a. Pathian in talent min pek ṭheuh hmang a eizawnna neih kan lo tum hian tu pawi ngei a sawi, tupawi mah a asawi hian ka ring lo. Chutih laiin, UPSC exam result chhuah a piang a kan celebrity te sawiselna lo ri luai luai ṭhin hi chu in enfiah kan ngai deuh lo maw!

- Lalmatea Chawngthu