MI HAUSA SUM ZAWN DÂN LEVEL A SÂNG
Delhi sawrkar mipui hrawn mêk AAP Ministry-a PWD changtu Satyendar Jain chuan, "Kum 50 ka tlin ve hunah sum zawnga hna thawh ka bânsan ang" a ti a. Politician a rawn ni a, MLA hna chu sum zawn nan leh vote zawn nân ni lovin hnathawh nan a rawn hmang a. "Vote zawnga hna thawk ka ni lo va, vote ka hmuh tawh vânga thawk ka ni zâwk" a ti.
Kan ramah chuan hausaten MLA ni chungin sum an zawng a, vote hmu tawh a nih vânga mipui sum hmanga mipui dâwm kân leh tihhmasâwn hna thawk lovin vote hmuh nan mipui rawng an intibâwl mêk a nih hi. He kalphung hi kan bânsan thuai loh chuan mipui rawngbâwl hna hi sumdâwnna hlâwk, sumdâwng thei tlêmte awmna ni bawk siah kan chhuah chhunzawm zel dâwn ni ngeiin a lang.
He rawngbawlna hi a hlâwk hle a ni ang, MLA nih hma aia MLA nih tawh loh hnua an hlawh leh thawh chhuah nena inmil lova sum ngah kan nei ṭhin hian a tichiang.
Tûn hnaia ka rilru luah thar tlattu pakhat chu ICU khum sawm pawh Minister-in a hawn a, South East Asia chu sawi loh Mizorama footpath sei ber pawh ni lo kan pu berte leh kan politician/ political charismatic leader ten an hawn hluai zêlna ramah hian vote hmuh vânga tling hnathawk ni lovin vote zawn nana hna thawhte hmanga mipui mar dehna a ni te pawh ti ila a sual viau dâwn em ni?
MLA ni tûr chuan hausa nih a ngai a, MLA nih leh zêl duh chuan hausak belh zêl, inthlan huna unit hruaitu aṭanga block hruaitute leh khawi emaw hmuna ruai ṭheh leh zauh thei nih a ngaihna hi a rei tawh. Mipui hi kan vir hle bawk, sum mai a ni lo, ui sa, vawk sa, ar sa leh ei theih loh silpauline pawhin kan lâwm tâwk.
Kan party candidate chu a politician lo êm mai tiin polician kan ngaisang a. Politician thusawi thiam, mi hneh thei, a taka chhawr bâwkna awm tak tak miah lo kan nei em ni, tûn ang kumah sum pûk hmanga hmasawnna hna thawh tûr agreement te kan lâwm tâk viau mai!
Mipui pawh hian mi hausa candidate aiin mi rethei dikna ngaina nia kan hriat mi theh chhuahsak ngam party hi kan mamawh tih kan hriat te pawh a hun tawhin ka hria.
Kum 2018 aṭanga 2021 hi kum ṭha kan ti dâwn nge ni, inthlan lian tham kan hmachhawn zawm zut mai. Chu'ng inthlanah te chuan mipui sûkthlêk chu hmân deuh aṭang khan danglamna a la awm tak tak lo tih a lang zêl ni te pawhin a hriat theih phah a. 2023 inthlanpuiah pawh hian tute emaw tih dânin mipui hmasâwnna atân ni lo party hmasâwn nan flagship programme te chu kan hman leh a rinawm.
Nakkum velah sum sem leh hmasawnna hna tlêm a zâwng thawkin, 2023 inthlan puan hma zawng nasa taka thawk anga lan nan kan vir mup mup ang a. Mipui arsa aṭanga silpauline nên chauh pawha lungawi theite hnênah 2024 chu Mosian kanaan ram a thlîr angain an râl thlîrtir leh ang a, a tak ram chan tûr erawh awm si lovin. Chu'ngah te chuan mipui aiin chu hmasawnna hnathawhnaah chuan khâwnbâwl upa te leh fatute hlâwkna chu a sâng thûr ang a, MLA nih leh theih nan mipui mimir hmuh phâk loh mual let liamah za zêlah 25 hi chu tûn ṭum chu ka chang ang e te pawh an ti lo vang tih sawi mai theih pawh a ni hleinem mawle!
Flagship programme-a kan hmachawp lian leh tum bulpui berte (top priorities) hi zuar lovin mihring kan han zuar leh tak tak ang a, zawrh kan neih rêng rêngin hlêp neih kan duh ṭhin tih hi mipui hmaah kan zêp leh tlat bawk ang a. Mipui tâna thawk tûra inpêkna aiin kan sum zawn dân level a sâng leh hle dâwn a ni.
- David Sunate