Governor thar umchhuak ang u

Kristian rama Lal ber dinhmuna ding turin Kristianna dotu, Kristian tihduhdah leh beihnaa mi hrat khawkheng awm hi tuin nge duh ang?

Kan hriat ṭheuh angin Mizoramin Governor thar Kum­manam Rajasekharan kan nei a, amah hi kum 1952 December ni 23 khan Kerala State-a Kottayam District-a Kummanam-ah a lo piang a. CMS College, Kottayam aṭanga B.Sc. (Botany) a zawh hnuah Journalism zirin Post Graduate Diploma a zo a. Kum 1970 khan RSS a zawm a.

Kum 1974 khan sub-editor niin Deepika chanchinbu-ah a thawk a, chanchinbu hrang hranga a thawh hnuah 1976 khan chanchinbumi nih bansanin Food Corporation of India (FCI)-ah a thawk ṭan a. 1979 khan VHP-ah Kottayam District Secretary niin 1981 khan State Joint Secretary a ni.

Kum 1987-ah FCI-a a hna aṭanga bangin RSS-ah hun puma rawngbawltu a ni a. Hindu chawilar tum pawl Hindu Aikya Vedi-ah a kul ataia inhmangin Secretary a ni. Kum 2015 Decem­ber 18 aṭang khan Kerala State BJP Pre­sident a ni.

Kum 1983 khan Nilakkal-ah Isua zirtir Thoma'n biakin a sakna hmun nia ngaih hmuhchhuah niin hetah hian Kristian Biakin sak tum a ni a. Hei hi Hindu ten duh lovin nasa takin an dodal a, hemi ṭum hian Hindu te chuan Nilakkal Action Council dinin hetah hian tuna Governor thar hi General Convener a ni. He pawl hian Kerala State pumpuiah Hindu te chu Kristian te do turin an fuihpawrh a, buaina tam tak an chawk chhuak a ni.

Kum 2003 khan Kilimanoor-a Kristian khawmpui - Koppam Protestant Convention chu RSS mi leh sa nia ngaih mi 10 rualin beiin American Missionary Joseph Cooper (60) chu hliam na tak tuar khawpa kutthlak a ni a. Hetihlai hian kan Governor thar hi VHP-ah State Organising Secretary a ni a. Joseph Cooper mai bakah Kristian Missionary 50 vel an chhinchhiah thu tlangaupuiin chung mite chu Kerala aṭanga umchhuah an nih theihnan nasa takin hma a la a ni.

Kerala-ah hian Kristian hi micheng zinga 18.38 % (2011 census) lai an ni a. Kum 2015 khan an Chief Secretary Jiji Thomas chuan Malankara Orthodox Church in bicentenary an lawmnaah thu a sawi a, Chanchin Ṭha hril hi ringtute tih tur a nih thu a sawi avangin tuna kan Governor thar hian an State Governor hnenah Chief Secretary chunga action la tura ngenna thlenin nasa takin a bei a ni.

Hetiang mi, Kris­tianna dotu leh Kristian te bei ṭhintu Kristian ram Governor-a a awm hi PRISM Party chuan a duh lo a, Mizoram aṭanga la chhuak turin June ni 11, 2018-ah India President hnenah ngenna siam a tum a. Hemi atana signature campaign an nei ṭan meka mi tam takin hming an sign hnan tawh nghe nghe a ni.

- C Laltanpuia