ENG DAMDAWI HI NGE KAN LO EI VE ANG HRI LO KAI TA ILA?

May thla tir khan LPS-in an kawm­naah Covid-19 Medical Operational Team Chairman Dr ZR Thiamsanga’n Covid-19 kaite tana in lama inenkawl dan a sawi a. Lu a natin paracetamol ei tih te, vitamin C ei tih te, tuiluma hrawk ṭhuah tih te, tuilum in tih te, ei leh in tih ṭhat te, tui lam in tam tur tih te, thei ei tam tur tihte leh mut tam a ṭhat thu te a sawi ni.

"Eng damdawi hi nge kan lo ei ve ang hri lo kai ta ila, mahni in lamah chuan lo in enkawl ta ila?" tiin zawh belh a ni a. Heti hian Dr ZR Thiamsanga’n a chhang a- "Nia, hei a damdawi tak tak hi chu a awm chuang lova. Amaherawhchu...Vitamin C han [ei] te pawh kha a ṭha ka han ti ta a. Tichuanin, hei doxycyline te hi khua a lo sik kha chuanin infection lo vennan khan mg 100 kha nitin vawi 2, ni 5 ang te kha an ei ta a. Chu chu a ni deuh mai a, a bak erawh chu, tlema a serious deuh kha chu, damdawi in lamah emaw ZMC lam pangah emaw khan a ni zawk ang a. In lamah erawh chuanin khatiang bak kha chu a awm lem lo."

Covid natna vei boral ta te hi a tlangpuiin 'natna dang' nei an ni a. Kum 50 hnuailam tan hian he natna hi a hlauhawm ta lo tihna ni lovin a risk a hniam tih hi khawvel pum kan en chuan a sawi theih. Amaherawhchu, natna benvawn kan tih ang chi nei kan nih chuan ṭhalai tan pawh a risk a sang thei tho a ni. Covid vanga boral, la upa bawk si lote hi chutiang chu a tam zawk an ni awm e.

Kum upa lamah natna benvawn neite-ah a thawk na a, thi an tam tih hi chu kan chiang tlang viau tawh a ni. Amaherawhchu, hrisel ṭha pangngaia ngaih, kum 50 hnuailamah te hian Covid positive an ni tih hriat aṭanga ni 10 chhung vela boralte an awm leh ṭhin. Hei hian kan inenkawl danah ennawn ngai a awm em? tih zawhna a siam thei awm e.

In lama inenkawlna turin 'damdawi tak tak hi chu a awm chuang lo' tih ngaihdan kan doctor-ten an neih miau avang hian 3C leh 4C lama inenkawlna thleng pawhin a ṭha tawk lo thei a. Damdawi in luh hmaa inenkawlna hi a dik loh chuan a dawt chu ventilator te kha a nih tawh ṭhin avangin hrisel ṭha pangngai pawh hi kan in chan leh mai ṭhin niin a lang.

He natna hi hlauhnain an doctor thiamna rilru a tihbuai loh doctor huaisen leh thiam tak takten nikum kum tir aṭang tawha damlo an lo enkawl aṭang te leh an inzirchhoh zel aṭanga damdawi tha an hmuhchhuah te hi tunah phei chuan an hmang thiam tawh lehzual a. Mizorama kan doctor te hian WHO leh ICMR hotute thurawn ngawt an lak chuan tuna an kal ang hian an kal reng ang a, a nih lohva ngaihtuahna thar an hman duh leh hman ngam erawh chuan nasa takin Covid damlo kan enkawl dan hi thlakin a awm thei ngei ang.

Khawvela Covid damlo enkawlna kawnga doctor rual intelkhawm ṭha ber pawl chu, Frontline Covi19 Critical Care Alliance (FLCCC) hi a ni a. An hruaitute chu Dr Pierre Kory te, Prof Paul Marik te, Dr Joseph Varon te, Dr Fred Wagshul te, Dr Keith Berkowitz te an ni.

Anni leh an thawhpui dangte hian a tir te aṭang khan damdawi mumal awm lo tih kha an pawm duh lova, damlo an lo enkawl tawh ṭhin dante leh an thiamna te hmangin he natna awmdan zir chung zelin damlo an enkawl a. Khawvela doctor leh sorkar hotuten Covid damlo enkawlnan a hman theih tih an pawm hma daih khan Methylprednisolone, Ascorbic acid, Thiamin leh Heparin te hi Covid damlo enkawlnan an lo hmang tawh a ni.

Tunah phei chuan Covid protocol hi an nei changtlung tawh em em a, damdawi dik hmanga enkawl vat hian damdawi ina luh emaw thihna pumpelhna a ni thei tih an hmuh chian avangin positive tih hriat veleha inenkawlna (early treatment protocol) hi thupui berah an nei a, an protocol lar tar I-MATH+ protocol ah chuan heti hian Covid damlo enkawl dan tur an sawi a ni:

Virus hrik that tur damdawi (antiviral) Ivermectin - ni 5 chhung emaw damchhuah thleng 0.4–0.6 mg/kg (chaw ei rual emaw ei hnu). 0.6 mg/kg dose hi Delta variant tamnaah emaw ni 5-na/hnu-a treatment tan chauh tan emaw pulmonary phase a nih tawh chuan an chawh a. Natna benvawn nei te tan an chawh bawk. Patling kg 70 tan Ivermectin dose khat hi 42 mg a ni tihna a nih chu. A tir phata treatment la tan, natna benvawn nei lo tan 0.4 mg/kg hi an dose chawh a nih avangin patling kg 70 ah 28mg a ni dawn thung tihna a ni.

Mizorama kan doctor te hian FLCCC doctor te protocol hi an zirchian duh chuan an website https://covid19criticalcare.co... ah hian a kimin an en thei a, an protocol chungchang an sawi video te pawh en tur engemawzat a awm bawk a ni.

ZMC-in Covid19 treatment protocol a siamah hian he antiviral damdawi Ivermectin hi “mild covid19 case” ah telh a ni a. Amaherawhchu a dose, ei dan tur leh ei chen tur hi kan en chuan “Ivermectin (200 mcg/kg once a day, to be taken empty stomach) for 3 to 5 days” tih a ni a. 200 mcg/kg hi 0.2mg/kg a ni a, dose hniam a nih avangin a rei berah ni 5 chhung chauh ei a nih phei chuan 0.4-0.6 mg/kg dose in a thawh ang hi a thawk lo ngei ang, a tir te nilo positive tih hriatchhuah atanga ni engemawzat hnuah phei chuan.

Covid hrik kai hian ka leh hnar atang bera tihdarh a nih avangin ka leh hnara Covid hrik awm thah dan tha hi FLCCC te hian a taka an enchhin tawhna atangin an protocol ah heti hian an ziak bawk a: Antiviral mouthwash: Gargle 3 x daily (do not swallow; must contain chlorhexidine, povidone-iodine, or cetylpyridinium chloride). Iodine nasal spray/drops: Use 1% povidone-iodine commercial product as per instructions 2–3 x daily. If 1%-product not available, must first dilute the more widely available 10%-solution and apply 4–5 drops to each nostril every 4 hours. (No more than 5 days in pregnancy).

Nikum kum tawp lam khan Chandigarh-a Dr. HSJ Institute of Dental Sciences leh CSIR-Institute of Microbial Technology tangkawpin chlorhexidine bik hi Covid hrik beihnan laboratory ah an enchhin a. Dr. Ashish Jain-a sawi dan chuan chlorhexidine hian second 30 chhungin laboratory-a an enchhin (experiment) naah Covid hrik hi a that vek thei a ni.

ZMC protocol ah hian chlorhexidine hi a tel a. Mild symptom nei tea hman tura tih a ni. “Chlorhexidine mouthwash for oral hygiene” ti-a ZMC protocol-a inziak hi kan doctor te hian ngaihtuah chiang se oral hygiene tan chauh a ni lo tih an hre thei ngei ang. Covid hrik thahnan a tha tih hi dentist research beituten laboratory-a an hmuh, a taka doctor ten Covid damlo enkawlnana an hman pawha awmze nei a ni tih an hmuh zel a ni a. FLCCC protocol ah hian “oral hygiene” mai nilovin “antiseptic antiviral” ah an hmang a ni.

Anti-coagulant damdawi atan Aspirin te, Melatonin te hi an protocol-ah an telh bawk a. Tin, Covid laka invennana pawimawh em em chu Vitamin D neih that a ni tih an hriat avangin immunity tih chaknan an protocol ah hian Vitamin D3 5,000 IU nitin ei an chawh bawk a ni. Duhthusamah phei chuan Calcitriol 0.5mcg hi a ni 1-naah nise, ni 7 chhung 0.25mcg nise an ti nghe nghe a ni. Covid natna in a beihnat zual reng reng te hi Vitamin D tlachham an ni deuh zela hriat a ni a, chuvang chuan Vitamin D level sang tha neih hi Covid laka invennan pawh a pawimawh hle. Darkar 1 vel tal zing kar nilum ai hi a hranpaa Vitamin D ei ngai lova Vitamin D level tihsanna a ni tih pawh kan hre tawh awm e.

Ivermectin hi antiviral damdawia hman a ni a, Zinc ionophore atana hman a ni bawk a. Covid hrik that tura tangkai em em chu Zinc a ni tih a taka an hmuh avangin Ivermectin bakah Zinc hi FLCCC te hian an protocol-ah an telh bawk a. Elemental Zinc 100mg hi nitin ei an chawh a ni. Covid damlo sang tam tak lo enkawl dam tawh a, doctor tam tak lo zirtir tawh New York-a Juda pa Dr Vladimir Zelenko sawi dan chuan Zinc hi Covid hrik kahnana silaimu ang a ni a, Ivermectin emaw Hydroxychloroquine hi silai ang a ni.

Hemi ringawt pawh hian nasa takin virus inthlahpung tur kha a veng thei a, chuap lam a khawih thlen lohnan heng damdawi te hi a tir phata ei an chawh thin a ni. Ziaawm lam panlo tan damdawi dang te pawh an protocol ah hian an chawh zel a; Fluvoxamine te, Spironolactone te, Dutasteride te pawh an telh a ni. Monoclonal antibody therapy hi a tangkai tih kan hre theuh a, hei pawh hi kum 65 chunglam tan an recommend a. Raipuar ah te leh natna benvawn nei te an an positive atanga ni 7 chhunga khai an chawh a ni.

ZMC protocol-ah pawh an telh corticosteroid hi UK Recovery Trial-a an hmuh kha tlawhchhana hman a ni a. FLCCC te hian UK Recovery Trial an neih hma daih tawh khan an lo hmang tawh a, damlo dinhmun (stage) azirin he’ng damdawi te hi a tangkai em em bawk a ni. FLCCC President Dr.Pierre Kory phei chu US Senate ah vawi 2 lai testimony a pe tawh a, an treatment protocol-a an hman damdawi hmanga Covid damlo enkawl dam theih an nihzia te pawh chiang takin a sawi tawh nghe nghe a ni.

He’ng kan han tarlan te hi Prof Paul Marik-a hova kum khat chuang an lo enchhin tawh hnua tha tawk an tih protocol-a an hman a ni a. Mizorama kan doctor te hian he’ng Critical Care specialist thiamten uluk taka an duan protocol hi en ve chhin se nasa takin Covid damlo an enkawlnaah hian hma an sawn ngei a rinawm.

"Eng damdawi hi nge kan lo ei ve ang hri lo kai ta ila mahni in lamah chuan lo in enkawl ta ila?" tih zawhna chhanna hi FLCCC-a doctor te leh Covid damlo hlawhtling taka enkawl tawh doctor te chuan fel fai angreng tak an nei a ni.

- Laltanpuia Pachuau