Zan Curfew Hmanga Sum Tuak

Aizawl khawpui chuan kum khat leh thla sarih zet mai chu zan curfew a lo hmang ta a, hei hi Covid dona atan a lak tlak lo a ni tih chu kan Covid posoitive neih zat aṭang hian a lang thei reng tawh si. Chuti chung pawha zan curfew an la puang lui zel mai hi chu sum tuakna ṭha tak a nih vang a nih loh chuan a chhan dang han sawi tur a awm tawh lo a ni.

Covid len vanglai khan vai ramah pawh zan curfew hi an puang ve thova, an sawi dan chuan mipui chet velna a tlem poh leh Covid hi a darh tlem a, chu vang chuan chhun lamah eizawnna avanga che chhuak lo thei lote pawh zan lamah chuan inah an lo awm tawh ang a, mipui chhuak vak satliah tur ven tur a ni tih a ni ber.

Tunah hi chuan chhunah pawh mipui khuahkhirhna pakhat pawh a awm tawh loh avangin zan lam curfew hi chu tih tawp a hun tawh viau a ni.

Zan curfew laia mipui tana huat thla la chu 'permit nei' an tih tam lutuk si ṭhin hi a ni. A curfew puangtu lam sorkar official te, Task Force badge nei phak chin te, card hrang hrang nei curfew lai pawha chhuak reng thei an awm lai hian chhungkaw thil lamah leh laklawh thil lamah hian chhuakin haw tlai palh ta ila Rs 1,000 fine a ni tawp tawp tawh mai.

Zanah misual an chhuak tlem ang a, police lamah crime report a awm lo ang, hna an nei lo ang. Tin, lirthei accident a tlem ang a, mipui lam aiin duty te zel an hahdam ang. Tichuan mipui lama nghawng a neih dan erawh chu ei leh bar zawnna kawngah a ni thung.

Hei hi sorkar hian a hre chiang tawh si a, mipui rilṭam eizawnna buai vanga mangang mekte tan chhawmdawlna sorkarin ama pualin a pe si lo a, eizawnna tibuai thei thil hi chu tih tawh loh tawp tur a ni asin.

Zan khatah hian Mizoram sorkar hian curfew hmang hian pawisa a lalut tam hle a ni ngei ngei ang. Curfew puan vang hian Covid hi a darh loh phah tawh lo tih chu Positive nei tam state kan ni hian a ti ching tho si a, pawisa tuakna a nih loh chuan zan curfew puan chhan tur hi ka hrethiam tawh lo a ni.

- Michael Lalremsanga