Kan Kristianna leh Politics hi...

Khawvel ram ropui Ame­rica chuan kum 1782 daih tawhah khan ‘In God We Trust’ tih hi Great Seal of the United States atan an lo nei tawhin, 1956 khan an Hnam thupui (Motto) atan an lo hmang daih tawh a ni. An pawisa nawi - Two - Cent ah ‘In God We Trust‘ tih chu kum 1864 khan an tarlang hmasa ber a, a hnu 1957 ah an pawisa lehkhaah an tarlang leh a, an Danpui meuh pawhin pass-in President Dwight Eisenhower chuan July 30, 1956 khan a nemnghet. Chumi aṭang chuan an pawisa tinah ‘In God We Trust’ tih chu an tarlang ta zel a ni.

Goerge Washington, American President hmasa ber a nih khan an ram Danpui (constitution) an han duang dawn a, a ni chuan “Pathian Lehkhabu Thianghlim - Bible tel lo chuan a dik thei lo ang" a ti. Hei hi tun hun thlengin an la vawng nung a, khawvel ram hrang hrangte pawhin kan chung en a nih hi.

Ram rawngbawlna- Politics field-ah lutin theih­tawpin inhmang mah sela, anni chuan an Pathian rinna chu an dah pawimawh tlat avangin ram ropui an la ni. Mizoram tan entawn a ṭul mang e.

India ram sakhaw dinhmun chu a ni a: Hindu - 74.33 %, Muslim - 14.20%, Christian - 5.84%, Sikh - 1.86%, Ethmo­reli­gionist - 1.35%, Buddhist - 0.82%, Non Religious - 0.48%, Other - 0.47%. Hindu hian State hrang hrangah pawh tam ber nihna an chelh deuh vek hial a, Maghalaya, Nagaland leh Mizoramah te chiah Christian chuan tam ber nihna kan chelh a ni.

Mizoramah hian Christian - 87%, Budhhist - 7.9%, Hindu - 3.6%, Muslim - 1.1% kan a ni, zaa za christian kan intih ṭhin kha chu a theih ta hauh lo mai, eng vang nge ni ang le?

H. Rammawi kha Minister a nih lai khan sakhaw thila rawng in hnawih hunah khan khatih laia kan Governor khan rawng hnawih ve a tum a, a ni chuan ‘Kei chu Christian ka ni a, ka duh lo’ tiin a chhang a, ka fak ngawt mai. Sakhuana hi ṭawngkam mai ni loin a taka lantir hi kan tih tur a ni. Missionary nuaih khat tirh thu Politician pakhatin a sawi a, politician pakhat lah chuan serh leh sang thilah a chal a lo hnawih sen bawk a, engtin nge Zoram an kaihhruai ang le?

Juda hnam ho khu Sakhuana kawngah chuan urhsun berte an ni hial awm e. An mipa te an ṭawngṭai a piangin an ṭawngṭaina puan ‘Tzizit’ an tih chuan an lu an khuh ngei ngei ṭhin a, chutiang chuan hmasang hun aṭanga tun hun thlengin an la chhunzawm a ni.

American chuan chhuang takin Pathian ringtu an nihna chu an lan tir a, keini hian engtinnge kan lantir ve ang? Ṭawngkam chauh ni loin thiltihah kan lan tir ve dawn lawm ni? Facebook caption a Pathianthu tarlang ang chauh maia lemchan hi chu sim tawh ang u.

Kan ṭhalai tam tak hian ram hruaitute-ah beisei an nei tawh lo a, Politics sawiin mi nuih kan tiza a nih hi. Politics ṭha lo hi kan tuar vek a nih hi. Zu vanga kan Police te thih tam tawhzia te, zu vanga hmeithai tam tawhzia te leh zu vanga Home-a dah leh natna tuar mek te hi kan ram hruaitute hian hriat hmaih hauh lo sela ka duh a ni. Nge hei hi ‘Kohhran mite ṭawngṭai chhanna a ni’ inti liam mai zawk dawn?

Aizawl dai velah kan nula tlangvalte zu leh sa nena khawsa lai hmuh tur a awm reng a, zu ruih vanga lirthei chetsualna a thleng reng bawk a, heng zawng zawng hi Kristian rama thleng atan chuan a rapthlak a ni. Biakin ropui tak tak kan neih te hi eiru reng chunga kawrchung haa necktie awrh leh uire reng chunga lam ang maia lemchanna hmun atan ni loa vantlang nun thlenga nghawng thei tur in zirtirna hmun ni sela ka duh ngawt mai.

Kan Kristianna hi kan damlai leh thih hnu thlenga pawimawh a ni a, Politics erawh chuan kan damlai chauha pawimawh a ni thung. Nimahsela, chuti chung chuan kan Kristianna hian ram rawng kan bawlna hmunah hmun a chang tak tak theih chuang tlat si lo a, kan Kristianna chu hmaikawrah kan hmang a, lemchanna hmanrua atan chauh mai kan hmang a nih hi!

Hetiang renga ram rawng­bawltuten hun an la hmang zel a nih phei chuan kan ram hian a tuar zel ang a, sakhaw dangin min la chim ral mai ang tih pawh awl tak tur a ni. Chuvang chuan ram rawng kan bawlnaah hian kan Kristianna hian hmun chungnung ber chang mawlh rawh se.

- Mahmuaka Chhakchhuak