THIL PAWIMAWH PATHUM

Mizote hi hnam hmasawn leh entawn­tlak a kan ngaih entawn mai ṭhin kan ni. Entawn tur tam tak zinga thenkhat sawi ila.

Israel-te: Bible hmun tam takah Israel-ten an ram, hnam leh sakhua an humhim dan leh beih dan kan hmu thei. Pathianin a pek an ram, an hnam leh an sakhua humhim tura an beihna hi an entawn tlak hle.

Bible piah lama an chanchin zelah pawh Israel-ten an ram, an hnam leh sakhua humhim nana an thawhdan hi a ngaih­nawm a. Lal dang leh pathian dang lakah an hel ṭhin a, Jerusalem ngaiin an ṭap a, nunna leh thisen tam tak an seng ṭhin. An humhim tur an hriat tlat avangin a ṭha zawk, nuam zawk, itawm zawk an hnar a, khawvel ngaihsan an hlawh a ni.

USA: Khawvel ram ropui America mipuiin an ram, hnam leh sakhua humhim tura an thawh dan hi a ropui. Indopui I & II-na chanchin te, President ropui tak tak te sawi tur a tam mai. President ropui tia kan sawite hi a taka an ram, hnam leh sakhua humhimtute an ni hlawm.

USA Presidential Election berah khan Hillary Clinton leh a thawhpuite kha liberal ngaihdan nei an ni. Tunlaina nunpui, in siamrem zung zung thei an ni.

Neih inang in kawp theih te, ramdang mi seng luh chungchangah te, khawvel ramdang nena an inkar thu-ah te Liberalism policy an nei a. Donald Trump leh a thawhpuite erawh an ram, hnam leh sakhua himna tur chuan mi tih duh loh te, tih theih loh awm tak te an sawi a. Tunlaina leh hmasawnna ngawt hian himna a thlen lo tih an sawi thung a nih kha. Election result-ah an ram, hnam leh sakhua himna an ngaihtuah avangin sumdawng mi, Donald Trump a tling a nih kha.

RSS: Nathuram Godse Temple, Gwa­lior Dist., Maddhya Pradesh a sak tum hi kan hre ṭheuh awm e. Nathuram Godse chu India Hnampa Mahatma Gandhi thattu a ni a. Ani chuan Gandhi ngaidan duh lovin "India ramah hian Hindu hi an chungnung tur a ni a. Sakhaw dangte nen ang khata leng za dial dial tur kan ni lo" tiin ngaihdan a nei a ni.

Chuvangin, Ma­hatma Gandhi chu Godse tan hnawk a ni a, a kaphlum ta a ni. Hun a lokal zel a, hetiang zirtirna chhawm nun tum pawl chuan a hming chawiin Hindu Temple ropui tak din an tum a. Inhnialna nasa tak a chhuak a, engtinnge a kal zel dawn a la hriat loh.

Nathuram Godse ngaihdan tawmpuitute chuan amah an khai­hlum ni pawh serhin 'sacrifice day' an ti a. 'India ramah hian Lotus lo chu a par ve tur a ni lo. Pang­par dang reng reng chu hnawksak a ni. Hma­sawnna leh thiltih­theihna pawh hi Lotus par a vul theihna atan chauh a ni tur a ni' tih chu an ngaihdan a ni tlat.

Mizote hi kan him em? Kan ramri, Chakma chungchang leh kan ram intodelhna leh hnamdang laka kan himna te hi a

ṭha tawk em? Political party hi ram siamṭhat nan kan hmang em?

Politics hi Pathian ram lo thlenna hman­rua atan hmang ila. Kan ram, hnam leh sakhua a him theih nan kan vote i hmang ang u.

- Phairothanga Chanmari, Aizawl