ENTAWN TLAK NUN!

He khawvelah hian kawng chi hrang hranga mite ngaihsan leh ngaih ropui, mi hmingthang leh lar tam tak an awm a, he khawvel hian a theih­nghilh tawh lo ang.

An thil tih leh hna thawh avang te, an thiamna bik (talent) avang te, an finna leh hriatna avang te, an theihna leh beih hahna avang te, an rilru put dan dikna avang leh ṭhatna avang te, an thawhrimna leh taihmakna avangtein mi tam takin midangte (an mihring pui vek) ngaihsan leh ngaih ropui, chawimawi leh fak, entawn an hlawh a; mah se, chutiang dinhmunah chuan mi tlemte chauh an ding thung.

Chuti ang a, keini aia mi ropui zawk leh awmthei zawk te, dinhmun tha zawk leh nuam zawk a ding te, mi hlawhtling zawkte leh an hun lai na na naa mite hriat hlawh zawk leh hmingthang zawk, lar zawk leh ropui zawk te, hruaitu ropui tak tak te leh mi thiam tam tak leh fing zawk te leh midangte tanpuina kawnga thawhhlawk em em, mi tam tak mah ina an thih hnuah mite hriat zui reng leh, sawi zui reng an hlawh lo a nih chuan, nang leh kei lek phei hi chuan kan thih ni-ah ngei pawh, min hretu ai mahin min hre lotu kan ngah zawkin a rinawm a - kan khua/ veng chhungah ngei pawh.

Chuvang chuan mite hriat reng tlak kan nih theih nan midangte entawn tlak leh zirtlak, chhuan tlak leh fak tlak, chawimawi tlaka kan nun kan hman hi a pawimawh khawp mai.

Engmah han hmingthan pui tur leh lar pui tur thil hlu leh ropui nei ve lem lo tan chuan midangte faktlak leh chawimawi tlak khawpa nun hman mai loh chu midangte hriat hlawh nih ve theihna kawng dang a awm miau loh avangin, mite entawn tlak khawpa kan nun kan hman hi a lo pawimawh hle a ni.

Kan sum leh pai, kan rohlu leh thil neih te, kan in leh ramte hian midangte'na min hriatrengna tur kawngah hian kawngro han sutna an nei lo va, pawimawhna an nei reng reng hek lo, kan nun dan hian kawngro a su berin, a pawimawh ber bawk hi a ni; kan nun dan kan uluk a pawimawh ber.

Mi tam tak tan entawntlak leh zirtlak, faktlak leh chawimawi tlaka kan nung thei lo emaw, kan nun kan hmang thei lo a nih pawn kan chhungkaw tan, kan ṭhiante tan, kan hnathawhpuite tan, kan hruaitu puite tan, kan mi hruai a te tan, kan veng chhung leh khaw chhung mite tan tal chuan entawn tlak, zirtlak, fak tlak, mawi taka sawi tlak nih erawh tum fan ila.

Mi tam tak hriat khawpin kan hming­thangin, kan lar ve thei lo a nih pawn mi tlemte hriat tur chauh tal pawn entawntlak nun neih tum tlat ila, mi hausa leh mi ropui ni ve lo tan chu aia hlu chu he mihring nunah hian thildang a awm chuang nem maw!

Mite angin khawvel mite hriat tur khawpa hmingthanna tur leh larna tur nei ve lovin, sum leh pai nei hek lovin, dinhmun nuam takah ding lo mah ila kan nunah dikna, rinawmna, huaisenna, zaidamna, dawhtheihna, ngilneih­na, inngaihtlawmna, insum theihna, taih­makna, tawrhchhelna, midang hmangaihna leh lainatna, ṭanpui duhna leh thilpek pek duhna, thil phalna thinlung hi pu ila midangte entawn tlak nun neitu dik tak kan lo ni mai dawn hi a lo ni.

- Nawlchunga Chinjah Meisatla, Siaha