Zu khap bur hi a tir aṭangin a lem

Tlem lai deuhva Pu Zosangliana thu rawn ziah, "Zu khap bur hi a lem sawt hle a ni" tih kha a tir aṭangin han hnial nghal pang mai ila. Zu khap bur hi tun hnaia lem ta thar thut ni lovin a tir aṭang khan a lem sa reng tawh a ni a, zu khap duhna ni lovin vote duhna nen zu hi kan buaipui a, sorkar zu khap dan mumal lo hian kan ṭhalai nun hi a suat zel dawn a ni.

Rangvamual te kha kan han sawi tak na a, mit ngeia hmu ṭhintu tan chuan Rangvamual chhehvel hi chu eng kim lenna a ni a, thil zawng zawng a thiang tih mai tur a ni.

Zu rui duh an rui a, awlsam takin zu a lei zung zung theih a ni. Ruihhlo dang duh tan pawh lei tur a awm sa tho bawk a, a bul kawngpui kamah pawh a inchiu ngam tho a ni. Mipui hmaizah deuh chuan tlema biru lai deuh an pan ve tih ang lek chauh a ni.

Denrite hnim rui duh thlenga zalen taka an tlat suau suauna hmun a ni. Chutah chuan a sen chi pawh a awm a, local a awm a, heng hi Excise leh Police hian an hre lo ni a ni lo a, an duty ve reng a, thil awm dan khu engkim keini ai pawhin an hre chiang zawk mah awm e. Zu leh thil dang duh tan chuan Rangvamual leh Phunchawngah chuan lei tur hi a awm reng a ni.

Chuta zu leh ruihhlo awm khawm chu man tum buai duh tawh lovin kawngpuia ṭhalai lo chho lirthei hrang hrang chu Vaivakawn chhung chin kawng sirah an lo ti ding a, an rinhlelh zawng chu an dap ṭhin a, an dap hlawhtling thei khawp mai. Hetianga an man sak chang hian an che ṭha a ni deuh mai zel ang chu!

A thlang lawk zu hmunah zu dap duh si lovin man chawia Aizawl ṭhalaite lei sa chu an han man sak ta ṭhin a, hei hi chu thil ngeiawm uchuak tak a ni. Lei tur awm lovin siam law law se mi lei sa man khawm mai mai lo hian.

Zu khap duhtu kan thlang tling a, an khap bur a nih chuan zu lei tur awm reng hi ti tawp teh se. Tuna a duh duh tan duh zat zat lei tur awm si, an lei fel vek tawh hnua lo man sak leh hnuhnawh hi chu thil lem lem a ni - Aizawl ṭhalaite hrekna a ni.

- Maruata Hnamte