BJP HI KAN NGAINA NGAI LO, Thawhpui phei chu kan tum lo reng reng

He thu hi nikum Assem­bly Session ah khan, House Leader ngei sawi a ni.

Mizoram Chief Secre­tary hming ṭha tak leh mipui ngainat hlawh, Pu Lalnunmawia Chuaungo IAS chuan, thla li vel service a la neih chu kalsanin Mizoram Chief Information Commisioner hmun ruak chu fel hmul takin a luah a. Pu Nunmawia chhuahsan CS hna pawh Pu JC Ramthanga tan reserve ruk a nih angin order pawh chhuah a ni.

Mahse beisei loh doral lian lo hrang tih ang maiin, Mizoram sawrkar aia thunei zawk Union Home Ministry chuan, Delhi hmuna IAS thawklai, Pi Renu Sharma chu Mizoram CS turin a rawn dah thuah ta hmiah mai. A chhan kimchang hre pha lo mah ila, lo zeldin chu a thiang turah ngai teh ang.

Pu Nunmawia leh Pu JC Ramthanga te hi thla tlemte chauhva service / kum inthlau an nih a vangin, Pu Duhthlana IFS kalsan mai tur CIC post chu kan CS hi offer niin, he ruahmanna Pu Nunmawia'n a pawm hian kum li chhung zet CIC nih theihna hun ṭha a neih belh rualin, Pu JC Ramthanga tan hian CS post a kian nghal a. A ni hian thla nga vel CS post a chelh ve theih phah dawn thung a ni. Mizo rilru taka in kenna zahawm tak a ni. Ruahmanna chu a fuh vel vek mai, Mahse Tualvungi leh Zawlpala te inkarah Phunṭiha a lo tlazep ang deuh khan, beisei loh thil a thleng ta. He thil hian, kan rama thu lar tak, officer thawhpui theih tih ṭawngkam chu hun engemawchen a rawn ti tawp dawn a nih hmel hle.

Kan CM thawhpui ngei ngei tur, Pi Renu Sharma chu Central BJP chuan an rawn appoint rup mai. Hemi chungchanga sawrkar ruahmanna hi a felfai hmel tehlul nen, chan loh khanah a chhuak ta a ni ber. He thil hian Mizoram CM strong tawk lohzia pawh entir nghala ngaih a ni.

Mizoram hian UT hun tawp lama kan CS, AH Scott thlak nan Mizo pa Pu Rohmingthanga kan neih aṭang khan kum 40 dawn chu Mizo CS kan nei ta. Tun aṭang chuan, CS ni thei khawp senior IAS officer kan neih hma chuan, hnamdang CS kan neih chhoh a ngai dawn ta a nih hmel.

Mizote hian chimral nih kan hlau hle a, hnam feeling pawh kan la nâ hle. IAS neih loh leh Chakma Minister pangparṭhi awrhtir te thlengin kan insawi hlauh siak ṭhin a, heng zawng erawh a thleng kim thawkhat ta thung.

Hnam himna tak tak zawk chu, Politics kalphung dik hi a ni zawk. Naga hnam pawhin IAS chu an into­delh bik lo a niang, Pu Lalnunmawia Chuaungo unaupa Pu Lalthara an lo hmang ve reng tawh tih kan hriat kha. IAS leh IPS te hi hnam himna sûtpui enkawltu an ni ber lo, state sawrkar thueitute hnuaia thawk mai tur an nih a vangin, sawrkar ṭha hi kan mamawh hmasa zawk chu a nih hmel.

Chief Secretary atana Mizo ngei kan neih chhung hian, politics lama hruaitu ṭha kan neih chuan loh avangin eng ruai kan thleng chuang lo tih hre chiangtute kan ni e.

Sawrkar tan erawh CS a tana Mizo IAS neih a, engkim titi pui theih leh Mizo nunphung hrethiam neih chu awlsam thlak tak a nih ngei a rinawm. Chutih lai chuan, dan palzut puia ruahmanna ruk siampui atan chuan Vai IAS chu an zahawm deuh rum thei a, Union Home Ministry fachuam deuh reuh a nih phei chuan Sawrkar/ CM thawklak tibuai hial thei pawh a ni ngei ang.

Kan Chief Minister hian, Dt. 29 October-ah DO letter thawnin Union Home Minister hnenah Addl CS ni mek chu Mizoram CS ni tura a duhthu a thlen a. A chhan zingah pawh NDA partner nghet ber an nih thu te, a cabinet tam berin English an thiam loh thu leh NDA ni ve reng chunga an dilna tih puitlinsak an nih loh chuan, hnar kan hmu lian dawn lutuk tih lampang biahthu te a tel nawk mai.

Dt. 30 October khan CS chhuak ta khan CIC a zawm nghal bawk. He ni tho hian Mizoram CS ni tura Pu JC Ramathanga ruat a nihna order pawh chhuah ve nghal niin, a thu chuan ni 4/5 vel CS a ni hman awm e. Hemi hnu lawk hian, Zawlpala hnen aṭangin Phunṭiha chuan Tualvungi a chhuhsak ta tih ang vel a ni.

A tawp nan chuan, BJP ngaina lo leh thawhpui tum lo anga insawi chungin, DO letter ngenngawla kan hmuh ang khan, a karfung atan chuan NDA partner rinawm ber nih thu chu thu vauchher ber atan hman a ni leh lawi a. Lehlama awr sen, lehlama awr dum, tih zawng zawng leh buichhia laih lovin a inpuang tih ang mai kan ni leh si.

Heng thu leh ui beng hlin fuh thiam hi a harsa ve ngar ngar ṭhin bawk e. Tunah chuan, Sawrkar hotu ber chunga (dan anga) thuneitu Governor te, sawrkar hnathawk zawng zawng chunga thuneitu CS-ah leh dan leh thupek kengkawhtu lama hotu berah hnamdang kan nei ta, hei bak pawh hi a la awm cheu awm e.

He hnam hian hian kil tin aṭangin endiktu kan nei ta a ni ber e. Sawrkar ang leh mipui/ hnam ang pawh hian fimkhur sauh ila, kan sawrkar hotute phei chu, hnung lama mit nei angin awm tawh teh se. Thlahdah taka Lalpa hnathawktu, ringtu chu anchhedawngin awm se, tih ziak a nih kha, i hre reng ang u.

- Vanlalhuma Kawlni, Ramhlun South