Inthlan intiamna kha hriat reng tur

Tun hnaia Tuirial Biala By-Election zet chu a pui khawp mai, Mizorama By-Election neih tawhah chuan a thawm na ber zinga mi a nih hmel a, MLA candidate te thutiam zozai kha lehkhabuin chhuah ila ngaihnawm tham a tling ta ve ang.

Tunah chuan thutiam ti hlawh­tling tur pakhat chiah thlan chhuah a ni ta a, amah MLA Pu K Laldawngliana leh MNF campaigner te intiamna kha ziaka chhinchhiah bakah a video awm thei kha chu chhinchhiah tur a ni. An tih hlawhtlin zar zar chuan kum hnih hnu (2023) ah thlan nawn leh mai tur a ni a, a tih hlawhtlin loh chuan thlan tawh loh mai tur a ni.

Kum 2018 inthlan dawn khan Zemabawk lamah hian candidate pakhat campaigner te chu an han intiam nasa awm khawp a. Zemabawkah chuan sorkar hnathawk lo an awm tawh dawn lova, Police Batallion thar din thei khawp hna pek tiam na a awm an ti hial. Kum hnih aia rei chu hna tiamtute chu an sorkar ta a, Zemabawk leh a chhehvel hian Police Batallion thar an la din lo chu a ni a, kum hnih dang lo awm tur hi thlir leh hrih tur a ni.

Serchhipah khan MNF intiamna hrang hrang kha ralkhat aṭangin a lo hriat ve thei a, kha tah pawh khan thil awm lo lutuk han sawi kha a awm ṭhin a, tun lai khawvelah hi chuan thil hi tiam fimkhur a ngai hle tawh bawk a ni. Mi mobile phone-ah kan intiamna hi a lo awm fir fer tawh mai ṭhin si a, nakin lawka miin min beih zuina tur kan siam mai mai lek a ni thei tlat tawh a ni.

Tuirial Bial inthlana intiamna kha han en ila, thlan tlin tuka artifi­cial grass phah te kha sawi rik a awm a. Chhun leh zana volleyball ben theihna han tih te, sikul hrang hrang kha sorkarin pawmsak tur, Anganwadi sak ṭhat, SEDP sem nghal, Futsal ground, kawng laih sak, hall sak tih leh a dang te kha a tam si a, kum hnih chhunga tih tur a nih avangin thawh nghal char char a ngai a ni.

- Vanlalliana