KA BUAI LUTUK, HUN KA NEI LO
He ṭawngkam hi kan hriat zin pawl tak a ni ngei ang. Eng emaw tih tur han sawi dek dek ila, Ka buai lutuk, hun ka nei lo tih hi kan hre leh ṭhin. Tute pawh hian kan tana ṭangkai, pawimawh leh ṭha tur nia kan ngaih atante leh kan duhzawng tih atan chuan hun kan pe thei vek mai. Indaih lo hle mah ila kan nuam tih zawng, hmingṭhatna leh ngaih pawimawh tak mite tan chuan hun tlem tal kan pe thei ṭhin.
Kan ṭangkaipui tur lem loha kan ngaihte tan erawh chuan hun awl nei mah ila, hun nei theih loh hram dan kan ngaihtuah a, chhuanlam kan siam a, hun kan pe thei lo ṭhin. Indaih loh lai tak tak chu a awm teh meuh mah se, Ka buai lutuk, hun ka nei lo tih nazawng hi chu a nihna tak zawkah chuan kan ngai pawimawh tawk loh vang leh kan hun kan pek phal loh vang a ni fo zawk ṭhin. Kan ngaih pawimawh tak tak thilah chuan kan program duan lawksa pawh kan tidanglam fo ṭhin zawk.
Tute pawh hian program hma chhawp kan nei vek ṭhin. Kan hun awl hnawh khah nan chauha midang ṭanpui kan tum hi a fuh chiah lo. Kan buai lai takte hi mite'n min mamawh hunlai a lo ni ve fo ṭhin. Kan hun neihte hi kan nuam tih zawng leh kan hamṭhatna tur ringawt atana hmang vek lovin, a ṭul hunah chuan kan nuam tih loh zawng leh kan chawi belh zawk hialna tur pawh ni se, midangte tana malsawmna ni tura hun kan pek a ṭul ṭhin.
Hmingṭhat theihna khawtlang leh kohhran thila hun nei tak, mimal ṭanpui ngai ngawih ngawihte tan erawh hun nei thei reng reng lote leh khawtlang leh kohhran hnatlan huna chhuanlam siam reng ṭhinte pawh kan awm thei awm e. Mahni hmasawnna tur thil tih nana hun inpea taima taka hnathawk thinte hian "Mahni tan chakai an khawrh" a ni. Midang emaw khawtlangte'n min mamawh viau laia mahni tan chauha hun inpe phalte erawh chu "Mahni hmasial" a ni leh thung si. Anihna takah chuan midang tana 'Ka buai lutuk, hun ka nei lo' ti fo ṭhinte hi chuan mahni hmasial takin mahni tan chakai an khawrh a ni ber mai.
Sapin "A sat laiin chhu rawh" an tih leh kan pipu ten "Sem sem dam dam ei bil thi thi" an tih hi kan hun neih sem zai thiam nan a pawimawh khawp mai. Ni tina kan hun neihte hi keimahni tan leh midang tana ṭangkai thei ang bera hmang tura sem zai thiam hi a ṭul ṭhin. Khawtlang leh mimal tana a ṭul huna hun pe ṭhinte hi mi tlawmngai, bengvar leh taima an ni fo.
Mihring hi inmamawh tawn vek kan ni a, a bikin kan chenpui, unau leh chhungkhat te, ṭhiante leh ni tin eizawnnaa kan thawhpuite hi kan inmamawh hun a awm ṭhin. Bible ah I sumin Lalpa chawimawi rawh tih a ni a, Mithiamten Hun hi pawisa a ni an ti leh a. A hun taka midangte tanpui hi Pathian kan chawimawi ve theihna awlsam ber a ni. Eng mi pawh ni ila, kan phur zawng leh ngaih pawimawh aia a ṭulna avang zawka mahni chauh inngaihtuah lova chhungkua leh khawtlang tana hun semzai thiam hi Pathian duhzawng pawh a ni ngei ang.
- Er. Chhungpuia Renthlei