CM thubuai chungchang

Chanchinthar puan aṭanga a lan dan chuan Special Judge (PC Act) Pu Vanlalenmawia'n Chief Minister Pu Zoramthanga thubuaia sum lakluh leh thil neih inmil lo ti-a puhna chungchangah finfiahna a awm theih loh thu a sawi a. Hei hi a dikin a rinawn, finfiahna hi a awm kher lo maithei a ni.

Pu KL Liana'n eirukna chungchanga a sawi kan hriat lar tak chu nula leh tlangval chesual lai hmu lo mah ila, a nula kha a rai tlat chuan... tih kha a ni a. Mahse, hei hi eiru-a inpuhna thubuaiah hian thutling a nih loh avangin Pu Enmawia sawi ang chiah hian a finfiahna kha a ngai a. A awm miau loh chuan court hian chhuah zalen bak kha tih theih a nei lovang.

Mizoram hmelma lian ber chu eirukna hi a ni a. Eirute hi a nihna takah chuan kan hre thei deuh vek a ni. Pastor te, upa te pawhin a nihna takah chuan an hai lo. Sorkar pawisa eiruk bakah sum lakluh leh thil neih inmil lo tih hi buaipui tham a tling.

Sorkar sum eiru lo pawhin khehpuam te, chiahpuam hmangten dik lo takin sum an siam thei tih kan hria. Thil dang dang hmang pawhin mi hian sum an siam awm e.

Dan lova sum lakluh hrim hrim hi a dik loh avang leh sualna a tihpunlun avangin sorkar sum eiruk a ni emaw thil dang hmanga sum siam ang chi hi dan hmanga dan chep zel a ṭha a. Amaherawhchu, mi sum lakluh zat hi hriat a nih loh chuan lo nei ṭûn pawh nise court-ah thiam loh chan ngaihna vak a awm ṭhin lo a ni. Chumi zawnah chuan Pu Enmawia rorelna hi a dik lo ti-a dem har tak a ni ang.

Mizorama eiru te, dan lova sum siam ṭhinte hi dan hmanga hrem an nih theihna tur chuan sorkar hnathawk leh thawk lo zawng zawngten sum kan lakluh hi finfiah a nih vek theihna tur 'system' kan hman a pawimawh a. Chhiah pek hi a kawng pakhat chu a ni a, mahse tun dinhmunah chuan Income Tax hi pek loh a pawi loh avangin kawng danga hmalak hi a ṭha hle.

A nihna takah chuan hman kuma kan buaipui hluai Tax Deducted at Source (TDS), kan IAS officer rual pawhin an do kha eirukna dona ṭha tak kan hman nghal theih a ni. Mahse, kan CYMA hotute berin an dova, sawi ang khan kan Mizo IAS officer-te pawhin an duh lo kha a ni a. Eirukna han dangchep tur hi chuan a la harsa deuh ni berin a lang.

Mizorama kan buaina lian tak dang leh chu kan in hre thum hi a ni. Hmaizah te hi kan ti na em em a ni. Tin, kan judiciary lama kan roreltute hi khawtlanga kan chenpui tho an nih avangin independent taka thil ti ṭhak ṭhak tur hian an tan pawh a harsa em em a ni.

Special Judge Pu Vanlal Enmawia tan hian Chief Minister chungthu han rel hi thil nuam lo tak a ni a, a neih rosum hi dan ang thlapa sum lakluh aṭanga a neih a ni lo tih lang kur pawh nise 'guilty' ti-a thutlukna han siam tur chuan zangkhaw bungbut hun a thlen phawt a ngaih hmel. Judge hian hriam hrek hrawkin he thubuai hi han kalpui tak tak se party mi ṭang ulh deuh deuh zingah vau duh pawh an awm ngei ang.

Chutiang velte chu kan la ni a, sapramah pawh hian politician eiru ngeia ngaih te hi 'guilty verdict' tak han pek hi chu an harsat ve ṭhin khawp mai!

- Maṭana Pachuau