A him tawh vanga tih a ni lo

Mizoram pum­ah Covid-19 la hluar hle mahse Mizo­ram sawrkar chuan nunphung pang­ngaiah min lêttir mek a. Hei hi Covid-19 laka kan invèn theih tâk viau vang emaw, kan him tâk viau vang emaw, kai a awlsam loh tâk vang emaw a ni lo a; eizawnna hna thawh a ngaih vang te, inkhuahkhirh reng theih a nih loh vangte leh mipuiin kan nin tawh vang te a ni ber zawkin a lang.

Zirna sikul hawn a ni ta leh pawl 10 leh pawl 12 zirlaite sikul an kái leh ta hi hripui an kai a hlauhawm loh tak vang a ni lo a, board exam hmachhawn tur an ni a, an tan sikul hawn a ngaia hriat vang a ni ber ngei ang.

Tunah pawh sikula hripui kai ta eng emaw zat an awm leh tawh niin an sawi a; sikul hawn a ni hi thil ṭha zawk a ni nge ni lo tih chu ka hrethiam ve lo - a ṭhat zawkna a awm thei a, a ṭhat loh zawkna pawh a awm thei mahna.

Biak ina kan inkhawm ta pawh hi inkhawm phal loh lai aiin tunah hian Covid-19 kài a hlauh­awm ta lo tihna a ni chuang lo a, thil danga kan inthlahdul dante ngaihtuah leh nawrna a nasat tawh bawk em avangin kan sawrkar hian a phal ta a ni ber. A awmzia ber chu - nunphung pangngaiah kan lêt a ngai a, kan hripui hi kan nunphungah mahni invéng chunga kan nunpui a ṭul tawh miau a ni.

November ni 12, 2021 a Health Minister hoa sorkar hotute ṭhukhawm chuan, inkhawmnaa zai a la him lo tih an sawi a ni àwm a, ni e, zai ai chuan zai loh chu a him zawk ngei ang. Mahse, kan tualzál nun te, thil danga kan inkhuahkhirh dan leh inthlahdul dante ngaihtuahin, zai pawh hi phal tawh mai a àwm khawp mai; kohhran ṭhenkhatah phei chuan phal a ni lo chungin an zai tawh a, làmtualah an lám hut hut tawh. Chung kohhranah chuan an zai leh lâm avangin hripui an inkai darh leh darh loh erawh ka hre lo.

Kan inthlahdul chhan te, a hmaah phal lo ṭhin, tuna phal tâk zawng zawngte hi hripui lakah a him tak vang a nih loh avangin, Pathian faka zai leh lâm pawh hi kan sawrkar hian a phal a hun tawh khawp mai. Mipui erawh kan theihpatawpa kan fimkhur erawh a ngai ang a. Tuna in­khawma zai phal tawhna district-te hi Covid-19 a ziaawm tawh­na district a ni bik chuang hauh lo zu nia!

-