Zak thei lo lo lalna Zoram

Tunlai Zoram khawvel han thlir hian, a zaktheilo apiang dinchanna Zoramah kan chhuah mêk a ni si. He din­hmun chhe tak aṭanga tho chhuak tur hian mipuiin rilru thar kan put a va han hun ta em ve le.

Tun hma chuan Bihar hi state hmuh­sitawm tak a ni ṭhin a, an Chief Minister Lalu Prasad Yadav pawh sum leh pai tam tak tih chingpen avanga tán ina khung a ngai hial a nih kha kan la hre reng ang. Kha tih hun lai kha kan thlir chuan Lalu Minister zak lo tak takte khan politics vawn fung an chelh avang khan zahna nei map lovin Bihar-ah khan an inleng vêl tih pawh kan la hria ang.

Lalu ang bawkin a Minister ṭhenkhat kha hming chhe tak tak, eiruk kawnga fihlim lo mai pawh ni lova thubuai rit tak tak nei an ni hlawm a ni. Amah Lalu ber kha ranchaw (Foder Scam) avangin an han man a, jail a tang chung pawhin sum leh thiltihtheihna a neih tawh tlat avangin a nupui Rabri Devi kha Bihar Chief Minister zuk nih tir leh thei a mawle! Lalu kha pa ropui tak a nihna chin chu a awm a ni. Lalu hun lai Bihar erawh chu a chhe em em a, rukruk leh tual thah a hluar a, miin Bihar chu fiamthu thawhna ang lekah an ngai tih kan la hmu ang.

Kan Zoramah hian sum neih tâk avanga zak map lo politician kan nei ta nual mai a, ṭhenkhat chu MLA te ni ve kher lo mahse ruling an nih avanga an thil neih pung thur thur mai te an ni a, an lal an hrawt a ni.

Heng bâkah hian zak map lo dang chu an history chhui tur pawh awm lova vawi leh khata rawn lian thur thurho hi an ni. Miin an rinhlelh dan chuan khehpuam lamah an inhnamhnawih an rin te, kuhva smuggling lam te rangkachak smug­gling lam te, a ṭhen phei chu ralthuam smuggler ang maia rinhlelh hialte pawh awmin heng mite hi Zoramah hian an zak map lo asin.

Sum leh lalna an ken kawp avangin hmanni lawka eiru leh hnathawh phu lova hausa pawh kha an inlulin ngamna Zoram a ni chho ta...

Bihar chuan Chief Minister thar Nitish Kumar an nei ta a, he pa hian Bihar hi a thlak danglam hlak thei a ni.

Bihar mi retheite sum lakluh a letin a tipung an tia, an Health Centre (Sub Centre) ah Doctor te a thawh tir a, zirna a thlak danglam a, amah ber eirukah a fihlim tlat avangin Lalu Prasad Yadav ang lo takin Minister eiru an ngampa ve lova, Bihar rama rukruk leh insuam leh eirukna a um bo ta duak a ni.

Zak thei lo lo lalna Zoram hian chhantu a ngai a ni.

- Lalremruata