SAKAWRHMUITUAI TLANG SKYWALK LEH CHALTLANG TO DURTLANG ROPE WAY PROJECT

He ka RTI zawhna hi October ni 28, 2021-a ka thehluh niin chhanna hi 10th November, 2021 khan min pe a, ka zawhna leh min chhanna hetiang hi a ni e -

1. Sakawrhmuituai tlang skywalk atan hian:

a) Central sorkarin sum engzat nge a approved? Approve-na copy min pe thei em?

Chhanna : Sakawrhmuituai tlang skywalk atan hian Rs 485.00 lakh sanction approve a ni. Sanction copy thil tel a ni.

b) Eng zat nge sanction ni tawh?

Chhanna : Ministry of Tourism-in pawisa hi Rs 242.50 lakh a sanction tawh a ni.

c) Pawisa eng zat nge hman ral ni tawh?

Chhanna : Sakawrhmuituai tlang skywalk bik atan hian pawisa hi Rs 283.50 lakh contractor JV NEIP hnenah a hnuaia mi ang hian pek chhuah tawh a ni.

Mobilization Advance 01.09.2017 - 48.50 lakh

1st RA Bill 17.01.2018 - 71.86 lakh

2nd RA Bill 25.04.2018 - 122.24 lakh

3rd RA Bill 22.05.2018 - 20.38 lakh

Part of 4th RA Bill 21.11.2018 - 20.52 lakh

Total - 283.50 lakh

Department-in a chut dan chuan, contractor JV NEIP-te hian hna hi 5% vel thawk zo a, Rs 24.25 Lakhs hmang tawh anga chhut sak an ni.

d) Central atanga pawisa sanction tawh hman bân a la awm em? Hman ban a awm chuan, chu pawisa chu khawiah nge dah/kawl a nih?

Chhanna : Central atanga Sakawrhmuituai tlang skywalk atana pawisa Rs 242.50 lakh an rawn release atang hian hman ban a awm tawh lo. Pawisa Rs 242.50 an rawn release aia tam hret Rs 283.50 lakh contractor JV NEIP-ah pek a ni tawh zawk.

e) Project hi engtik hun chhunga zawh tura ruahman nge?

Chhanna : Project hi thla 16 chhunga zawh tura tih a ni a. Amaherawh chu, Covid-19 pandemic te a awm avang leh Durltang-Chaltlang Ropeway project chungchangah contractor JV NEIP te nen harsatna kan nei tih an hriat avangin Ministry of Tourism Govt. of India chuan December 31, 2022 thleng hun min pawhseisak a ni.

f) Project kal lai hi chhunzawm a ni em? Chhunzawm a nih loh chuan eng vanga tawpsan nge a nih?

Chhanna : He project hi chhunzawm a ni tawh rih lo. November 2019-ah Sakawhmuituaitlang skywalk hi hna chawlh san a nih tawh avangin contrctor JV NEIP hnenah explanation pawh 30.12.2019 khan call a ni nghe nghe.

g) He hna chungchanga thil kal fel lo awm anga sawi hi CBI chhui tir tumna a awm em?

Chhanna : Sorkarin hmalak dan tur a ngaihtuah mek.

h) He hna chungchanga thil kal fel lo awm anga sawi awmah hian state sorkar level-ah a mawhphurtute chunga action lak tumna a awm em?

Chhanna : Hei pawh hi sorkarin a ngaihtuah mek.

2. Chaltlang leh Durtlang inkara ropeway hnathawhna tur chungchangah hengte hi ka zawhna a ni e:

a) Chaltlang leh Durtlang inkara ropeway hnathawhna tur hian cheng eng zat nge central atangin saction awm tawh?

Chhanna : Central atangin Chaltlang leh Durtlang inkara ropeway hnathawhna tur hian Rs 2482.58 lakh sanction a ni.

b) He hna thawhna tur atan hian Mizoram sorkarin cheng eng zat nge a dawn tawh?

Chhanna : He hna thawhna atan hian Mizoram sorkarin Rs 1241.29 lakh a dawng tawh a ni.

c) He hna thawh nan hian cheng eng zat nge hman ral ni tawh?

Chhanna : Durtlang-Chaltlang ropeway bik hnathawh nan hian contractor JV NEIP te hnenah a hnuaia mi ang hian Rs 1317.80 lakh pek a ni tawh a ni.

10% Mobilization advance 01.09.2017 - 248.26 lakh

1st RA Bill 17.01.2018 - 312.67 lakh

2nd RA Bill 25.04.2018 - 544.39 lakh

3rd RA Bill 22.052018 - 107.45 lakh

Part of 4th RA Bill 21.11.2018 - 105.03 lakh

Total - 1317.80 lakh

Department in a chhut dan chuan, hna hi 4% zo tawh leh Rs 99.30 lakhs man hu vel thawk tawh nia hriat a ni.

d) Hman zawh a la nih loh chuan pawisa la hman ban chu khawiah nge dah/kawl a nih?

Chhanna : Central aṭanga Durtlang-Chaltlang ropeway atana pawisa 1241.29 lakh Ministry of Tourism-in a rawn release atang hian hman ban a awm tawh lo. Pawisa Rs 1241.29 an rawn release aia tam hret Rs 1317.80 lakh contractor JV NEIP ah pek an ni tawh zawk.

e) Chaltlang leh Durtlang inkara ropeway hna thawk tura thlan an awm tawh em? Tute nge thlan an nih? Engtia thlan nge?

Chhanna : Chaltlang leh Durtlang inkara ropeway hna thawk tura thlan an awm tawh a, chu mite chu Joint Venture NEIP and Ropeways & Resorts Pvt. Ltd te an ni. Restricted Tender hmanga thlan an ni.

f) Hna hi thawh chhunzawm a ni em? Ni lo ta se eng nge a chhan?

Chhanna : Hna hi thawh chhunzawm a ni rih lo.

g) Engtik chhunga thawh zawh tura ruahman nge?

Chhanna : Project hi thla 16 chhunga thawh zawh tura ruahman a ni a. Amaherawh chu, covid-19 pandemic te a awm avang leh Durtlang-Chaltlang roprewy project chungchang hi contractor JV NEIP te nen harsatna kan nei tih an hriat avangin Ministry of Tourism, Govt. of India chuan December 31, 2022 thleng hun min pawhseisak a ni.

- Vanneihthanga