ENGTIKA HMAN TUR NGE?

Chanchinṭha Mathaia ziak 5:9 “Remna siamtute chu an eng a thawl e, Pathian faa vuahin an la awm dawn sia a,” tiin a in ziak a. Luka 2:14 ah chuan, “Lei chunga a lawm em em mihringte hnenah remthu leng rawh se,” tih ziak kan hmu bawk. Heng hi Pathian thuchhuak a ni a, remna hi Pathian hian a ngai pawimawh hle a ni. 

Khawvel pawh hian remna leh muanna a mamawh hle a ni. Mizoram pawh hi han sawi kai ta ila, rambuai kan nih lai khan India sipai hnenah kan inhek a, mi tam tak sipaiin min man phah a, jail chhungah mi tam tak an tang a, thih phah hial te pawh an awm awm e. Vuakhlum te, kahhlum hial te pawh kan awm niin a lang. 

Khang hunlaia thil hreawm sawi sen loh Mizo mipuiten kan tawrhna hun khan min liam san tawh. 

Kum 1986 June 30 ah Remna kan nei ta a, a va hlu em! Engtizia tehreng nge ni remna leh muanna hnuaia hlim taka Zoram a awm laia kan ram rorelna sang bera thu duh taka kan thlantlin MLA ṭhenkhat leh Kohhran upa ṭhenkhatten an MLA pui Upa Lalduhoma chu MLA nihna aṭanga ban tura speaker hnenah an hek tak mai? 

Kohhran Upa-in a rawng­bawlpui Kohhran Upa chu lei roreltu hnenah a hek ta mai hi Pathian hnathawh a ni thei ang em? Han ngaihtuah chhin pawhin kan ṭim ur ur thei a nia, a va pawi em! Pu Lalduhoma hi Speaker hian MLA a nihna hi ban ta sela, Mizoram tan engnge hlawkna awm ang? Eng hmasawnna nge Mizoramin a hmuh phah ang le? Kristian rama thleng atan chuan a va duhawm lo em! 

Politics-ah chuan ngaih­dan inan lohna te, inhnial deuh chang te chu a awm ṭhin a, kum 3 em pawh MLA a la nih hma a, an aia senior zawk, an upat pui an mal beih ta mai hi Zoram history a chuang reng atan a va duhawm lo ve. Grik thufing chuan, “i zuan hmain i tlakna tur hre chiang rawh, thuthlukna i siam hmain a chhe ber leh a ṭha ber nghawng a nei thei tih hre chiang rawh,” a lo ti a. 

Heng kan MLA 12 te pawh hian an thiltih hi an ngaih­tuah chiang lo a ni mai lawng maw? Ram rotling leh ram hmasawnna rawn luang chhuak tura mipuiten beisei­na sang tak anmahniah kan neih laiin an MLA pui hek awm tawk vel MLA an ni tur an hmu phak lo em ni ang? 

India Constitution-ah hian Lalduhoma te ang hi hek rawh u tiin a awm awm si lo va. Hetiang a nih lai October ni 9 a Vanglaini chanchinbu chhuakah MNF MLA ten Lalduhoma kan huat vang a ni lo tih an sawi an sawi ta mai hian Mizoram a deng chhuak a. An huat vang a nih loh chuan an hekna hi withdraw leh mai se, a va puitlin tlak awm ve. Pu Lalduhoma pawhin ni 8.10.2020 Vanglaini chanchinbu chhuakah phuba ngaihtuah loh tur tih a rawn sawi bawk a, a va lawmawm em! 

Heng thute han ngaihtuah hian in rem tlang thei se, MLA 12 te pawh hian an hekna hi withdraw se, Pu Lalduhoma pawh hian ngaidam ngei se, a va duhawm dawn em! A thu han rem chung changah Speaker tan thil har tawpkhawk niin a lang bawk si a. 

Covid 19 hri vangin khaw­vel leh Zoram a buai a, kan Map ramri lamah Silchar vaihovin buaina an siam fo bawk si a, hengte avang pawh hian Mizoram MLA ho te hi ṭanrual se la, in ngur a, in seh tawn mai mai lo hian. Hmelma thuhmun hi kan do tlan a ngai ta tak meuh a, tun hi remna siam hun a ni lawm ni? Ram leh ram an indo chuan tunge ding chhuak ang? Mizoram i hmangaih chuan remna siamtu nih tum ang che. 

Remna siamtute chu an eng a thawl e, Pathian fa a vuahin an la awm dawn si a.