Ṭawngṭai Chhanna!

Mahni hek huama midang tana insengso ṭhinte hian hringnun an timawi a. Chutiang mite avang chuan kan nui a, mi tam takin khawvel hi an zuam thar leh ṭhin. A ni, anni avang chuan khawharna thûk tâk aṭanga chhanchhuah mi tam tak an awm a. Anni avang chuan mi tam takin zawhna harsa, chhanna an hriat bik loh pawh a tla fai duak ṭhin. Chutiang mite chuan hringnun hlutna teh dan min zirtir thar ṭhin a ni.

Thinlung hlimna thuruk chu lungawinaah a innghat a. Lungawina kan teh dan erawh a inang lo. Kan phâk tawkah lungawina kan buan ṭheuh a. Mi tam takin lungawina an hriatthiam dan chu neih ṭeuh a ni ber a; mi tam tak erawh chu chutiang an ni phâk lo. Rualawhna hrim hrim pawh hi a chang chuan hmelma thim ber a ni a. Rualawh chhan tihpuitlin tum lah chu pialtlepa liluh tum ang mai a ni ṭhin. Dinhmunin a zir loh chuan mi tam tak tán rual pawl ringawt pawh hi thil hautak a ni a. Mi fel nih phei chu vana rah ang a ni hial. Rualawhna leh hrehawmna hi thil sakhat, phel hran theih loh khawpa inkawp chawt mai an ni a. Mi tam tak tán rualawhna chu duhâmna a nih theih rualin, mi ṭhenkhat tán chuan tlakchhamna sawifiahtu, zahna leh mualphona tarlangtu a ni.

Retheihna hian hmelma a ngah em em a. Mita khanchhuk awm ang leh, thinhnuna chemte hriam pâi rûk tlat ang maia hrehawm, khawi hmunah mah ralmuanga mi awmtir thei lotu a ni. Mi harsa tán chuan khaw êngte hi a zahawm a, mi zawng zawng hi an hlâ a ni. Mi hausa an zahawm a, mi pawisawi thlengin a awlsam zual emaw tih tur a ni. Engmah khawpkham lohna avangin engkim mai râwp a nâ a, mi hausa motor darthlalanga inen chenin fimkhur ngai tak vek a ni. Mi hausa dawr kawta ṭhut ringawt pawh huaisenthlak tak a ni a. Thawmhnaw man to dawra tei lut ve satliah tur pawhin zahtheih loh a ngai ṭhin. Châk zawng leh it zawng neih ve ringawtte hi thiang lo leh him lo, retheiha hnu hmana mahni intihhrehawmna a ni lek fang.

Mihring nun hi chu a tei a tei a, a kal zel a, hlimna leh lungawina zawngin châkna leh duhthawhna kiangah a zâl leh nge nge ṭhin. Chutiang mihringte chu a lawm ban phâk loh lungawina uma thisen far ral raih thlenga mahni tán nung ṭhin! Kan mak a sin! Kan han inkhawl a, kan han inlei lawk îm êm a, kan ei ral sên sum leh pâi kan pawm thuah a. Kan luah sên loh ram kan luah a, kan enkawl sên loh ramah kan hming kan tar a. Kal paha miten kan hming tar an chhiar an chhiarte chu ropuina tehkhawngah kan ngai a ni ngei ang. Luah sen loh rama invalh leh ei sen loh rosum thiltihtheihna hian nunna dang pakhat tal min pe thei se la khawvelah hian lawmna duhawm kan neih belh tur. Chu erawh chu khawvelin a chhuan tawlawl mihring ropui leh hmingthang sâng tam takte hlawhchhamna thuhmun a ni!

Neih belh leh khawlkhawm hi mi tam tak hlim chhan a ni. Thihna khuma mahni robawm chabi thlamuanpui tlat khawpa mihring chavai a awm theih a. Chhuan tam tak daih ngah hnu pawha eng mah nei lo ngam khawpa rethei a awm theih. Duhâmnain a dâwi, engkim mai keipui sa hauh hlur thiam riaute hian eng ang lungawina nge an zawn ang tih hriatsak lo mah ila, eng tikah emaw chuan an thinlung duhzawng bumin an awm tih an hrethiam ang.

Mi tam tak chuan kan hlim chhan tur hi kan kawmpui a. Kan lawmna tur hi kan up bo ni a ni. Nun inzarzawm tlângin a din, khawtlang nun inmamawh tawn ngawih ngawih kârah hian mahni chauha lungawi zir hi mihring tán a hahthlak tlawk tlawk a. Midang mamawh phuhru ve ngai reng reng lo tura mahni robawm vawng fimkhur mi chu ramsa no hruai koham aiin a changkang chuang lo! Mi ṭhenkhat chu kan kiang lawkah a tlu a, mi ṭhenkhat chuan eng mah an nei lo. Mi ṭhenkhat nunna chu kut insuih rial chauha chhanchhuah theih an ni a. Mi ṭhenkhat chu khawvelah hian beisei tur an la nei tih hriattir an mamawh a ni - kan ruala an nuih ve theihna turin!

Mi tam tak chuan tute emaw thilphalna kal tlangin khawvelah hian beisei tur a la awm a ni tih an hre thar ṭhin a. An nunkawng harsa tak avangin an dinhmun harsa tak aṭang chuan bân an rawn phar chhuak a. Khawvel hi an ta a ni tih hriat ve an duh a ni. Kan ruala ke pên an duh a. Kan ruala Pathian hnena lawmthu sawi ve an châk a ni. An ṭawngṭai chhanna hmanrua an mamawh a. Lei leh Vàn inkara leilawn dawh zawmtu an mamawh a ni. Kan ṭawngṭaisak ṭhinte hian khawvel hi a êng zawnga an thlír ve theih nan thinlung lawmna an mamawh ṭhin a. An tán Lei leh Vàn inkara lawmthu hrilhna kailâwn leh hmanrua kan ni thei. Kan ṭawngṭai chhanna kan ni thei.

- C. Lalbiaknunga Durtlang North