Sorkar hian ram pawn kuhva rah lo lut hi Champhai District-a thar angin a pawm em ni?

YouTube channel pakhatah chuan kuhva rah tawlh ruk (a ruk pawh a ni tawh lo) chungchang hi Kuhva Mafia tiin an sawi a. Chutah ka lo la hriat ngai loh an rawn sawi chu khaw chhak aṭanga dan lova kuhva rah lo lut hi dan anga lut anga chan tir turin Champhai District chhunga thar chhuah angin an ziak lut a, chu chuan GST an chawi a, Mizoram kuhva thar chhuah angin an thawn chhuak tih a ni.

Hei hi dawt nge thutak? tih hi Mizorama journalist kan neih ṭhat tak tak, a bik takin TV lama report pe ṭhinte hian a hmun ngeiah kal chilhin India Today/ BBC ten an tih ang hian rawn ti chhuak ve se, Mizoram hian thu dik hriat kan phu a ni.

Khawchhak aṭanga kuhva lo lut hi ruihhlo a nih loh avanga "A pawina a awm lo reng reng," kan ti a nih chuan "Kan ramah hian thawhrim leh lehkhathiam aiin black market hi hlawk zawk rawh se," kan tihna a ni ang a, chumi phaltu chuan Mizoram chhiat zelah hian mawh a phur a ni tih pawh inhre rawh se.

Kuhva rah tawlh hian Aizawl in hmun man a nghawng tih te pawh hi lo chhut ve teh u. Falkland leh hmun rem deuhva in hmun hi tun hnai kum thum kum li vel chhungin tute nge lei tam ber? Mahni thawh chhuah mila khawsa, mahni kea din tuma in hmun tlawm lei tuma kum tam inkhawl tawhte in hmun man thlenga a nghawng tawh hnu hian, "Ruihhlo tawlh pawh ni hlei lo," tia kuhva black market pawisa ita kan au kan au tawh chuan sorkar nen ṭang rualin kuhva hi tawlh suau suau tawh zawk ang u hmiang? ti ila kan duh em?

He kuhva lo lut ru na na na India ram (Mizoram) chhunga thar chhuah anga GST pek theiha an siam a nih chuan hei lo liama 'dawt' chiang hi a awm thei dawn em ni? Hemi hian Hachhek tlangdunga ṭhangkhat lian kuhva hmanga eizawng, kuthnathawktu rim taka hnathawkte market a ti chhe tawh a ni.

Khawchhak kuhva tawlh ruk hian khawthlang pa ho a vel mek tih hi Mizoram sorkar hian hria se, Kuhva GST hi a tak tak a nih chuan titawp nghal rawh se.

- Lalṭanpuia