Suma lei theih nih in inring em ni?

Mizoramah hian inthlan dawnin sum a leng nasa an tih teh chawk a, a hre zau deuhte chuan Mizoram chu sum a len tlemna ber zawk a ni, an ti zui a. Kumin inthlan lo awm turah hian, sum hmachhuana ke pen tum awm hi an awm dawn niin a lang - heng mite hian suma inlei tlin theih an inring em ni?

BJP hian Mizoramah sum an sem an ring fur, BJP hotupa khan sum an hmachhuan loh tur thu a sawi a, ka ring lem lo. BJP hian sum nei lo se Mizoram Kristian ramah hian beisei tur an nei lo. Narendra Modi hnathawh ṭhat hi an sawi teh chawk a, tun thlengin ka la hmu thiam lo. Pawisa a tithi a, Indian economy a tlak chhiat phah. Petrol leh diesel man a to zel. Swach Bharat hi a ṭha ka ti a, World Bank aṭanga India sum puk erawh rapthlak tham khawpa tam a ni. India a hausa sawt lo. Zin veivahnaah sum a seng tam hle. BJP avangin RSS an huangtau a, India ramah bawngsa eite an khap thul, Hindu rama siam min tum. Heti chunga Mizorama lo phurpui viau tute hi chuan an ‘sum’ hi an duh a ni mai a, Mizorama ram lak an tum pahw hi ‘sum’ kal tlang tho a ni.

Congress hian sum hmang bawkin mipui hip an tum. NLUP hmangin tunah hian ‘vote lei’ an tum mek a, vote tam tak hi chu an lei thei hialin ka ring. NLUP aia pawisa hmanna remchang tam zawk, an duh duh dana an hman theih tur NEDP an ti a, hei hi thil ṭha tak, state tana ṭhanna thlen thei tur khawpa thil ṭha ni mah se inthlan kuma an hman duh dan en hian hmasawnna aiin vote zawnna a ang ka ti. Sorkar sumin vote lei an tum a ni mai a, sum an hmachhuan a ni.

MNF lah an bang lo. Anni hi mipui hnena pawisa pe ve lova kum 10 sorkar an ni a, Mizoram pawisa kha sorkar hnathawk hlawh bakah chuan party worker (contracotr lem leh supplier lem) hnenah a kal ral vek. Congress hi chuan vaibelchhe tel tam tak NLUP hmangin mipui an pe a, an la ziaawm deuh. MNF hian pawisa sem tur an nei ta chiah si lova, a bain pawisa an sem tawp mai. SEDP an ti. SEDP-a pawisa sem tur zat an sawi dan a inang lo, MNF President chuan kan zavaiin cheng nuai 3 min pek a tum. Ka awih lo hulhual. A tum chu he ‘nuai 3 it hian MNF kan vote’ a niin ka hria. Suma lei theihah min ngai a nih hmel.

ZPM hian pawisa sem tum pawh ni se an nei lo. Sum sem tur nei se an sem hreh pawh ka ring chuang lo. An zingah hian ka mi rin em em, rama tana inpe em em leh an sum neih pawh seng hreh lo tur ka hmu. Chutihlaiin an hotupa leh mi ṭhenkhat hi kei chuan ka ring lem lo. Sum an neih loh avangin an sem lo vang. PRISM hi an ṭhat hmel. A hre chiangte erawhin an ngaisang lem lo. Corruption do pawlin sum lakluhna puanzar nei lem lova office ṭha tak an luah thei reng leh an hruaitute ṭhenkhat hnathawh mumal sawi tur awm lem si lova an khawsak a harsa lem lo hi a hre rilte chu an nui ru deuh tet tet. Sum an sem dawn lo, sem tur an nei lo ang.

MLA-a din tum aṭanga an dinna biala ‘ṭanpui tur’ zawng ruai, JCB leh khawl lian dang hmanga ‘hnatlang’ deuh reng, mipui hmuh theiha ‘tihlawmna atana sum seng’ duh mai, ‘lar hrim hrimna a nih chuan pawisa sen hreh lo’ ang chi an pung zel bawk. Kei chu NOTA hian sum an sen loh avangin ka vote leh nge nge mai dawn em ni? Mizote suma lei tawka min ngai party leh MLA candidate-te hi ka hua.

- K Lalmuanawma (Maawma)