Nang, han ṭanpui ta che…

Ngaihtuah chiana hahthlak tak kan ramah hian, tunlaiin hmun hrang hrangah chhiat tawhna lian tham aṭangin a te lam deuh thlengin a awm chamchi a.

Kan Political Par­ty te thusawi dan mawlh mai hian min ti lungngai leh ta hlawm chu a nih hi! Kan hma lawkah inthlan kan hmachhawn a, tun ṭum inthlan chu politics khelh danah pawh tunlai ṭawng takin class deuh hlek kan lo beisei ve tawh nen, eng kan ni chuang dawn lo a nih hmel.

Chhiat tawk awm se, “Nang va ṭanpui teh” tih melha kan inmelh laiin, ram pum nghawng hlawhtlinna liam tham a lo thlenin “Kan hunlaia kan ṭan” tih ṭawngkam kan inchuh a. A hah­thlak teh zawng chu a nih hi. Ṭhang khat lian mai pawh ni lo, generation tam tak an en liam tawh chung pawhin thil tihṭhat lang thama inel aiin ṭawngkama in den bawk kan theih tawk a nih leh tak hi. Awn lam nei taka ṭawng duh tan phei chuan ‘a ngaiah te bawk hi chuan ram ropui kan thleng dawn lo a nih hi’ tih mai awl tur a ni.

A tira kan sawi chhiat tawk awm se, thuchhuah kan hmuh reng rengah “Kan tawrhpui hle a, a rang thei angin chhiat tawk te sawrkarin ṭanpui se kan ti” an han tia. An tawrhpui viau te chuan anmahni ngei pen chhuak se, a hmunah tlawhin ṭanpui an ngaih dan zawng zawng va hmu se. An theih tawka an puih ve hnuah sawrkar an duh anga a che lo a nih chuan sawiselna te chhuahin finchhuah ta zawk se, mipuiah hi chuan an va han tla na lehzual dawn tak em! Mahse, hmana eptu lam apiangin an tih ṭhin ang bawkin, ṭanpui turin midang kan la phut hmasa zel a nih hi.

Tuna kan indem dan leh kan khelh danah hi chuan, ram hmangaihna rilru tak tak pu leh, ram siam ṭhat duhna tak tak thinlung pua politics a zuang lut kan tlemzia hi Luka ziak tluka chiangin anmahni ngei hian an tar lang chiang a ni mai lo em ni?! Kan lan dan tlangpuiah chuan duhtawka sawi a, a saseha tlanchhe leh si hi kan ang ber. Mahni hamṭhat nan leh kan chhungkaw ṭhatna tur a nih chuan ram vei pha tawh miah lo hian hlawkna belin Party inpui kan bel hi a ang ber zawk. Party inpui kal pelha tu emaw thusawi lai patling ṭhan kin rualin an ngaithla ṭhup mai han hmuh a, an thu khel han ngaihthlak phei chuan eng nge kan beisei a hriat tawh lo a, mipui nge min bawl party worker zawkin tih pawh hriat thiam har tak a ni.

A nuihtu mipuite pawhin kan nuih liam karah hian an lakah hian kan chhungkaw bil hamṭhatna tur kan ngaihven ru ve tho tih hriat reng. An thutiam ropui tak tak, term hnih thum chhung pawha hmun thuma ṭhen hmun khat pawh ti zo thei lo te kan han thlang tling leh nulh zel tho chu a nih si hi.

Chhiat tawk te midang ṭanpui tura auhsak chiam aiin, keimahni ngei chhuaka ke kan pen hmasa tur a nih ang chiah hian, kan ram siam ṭha tur hian mipuite hian ram hruaitu kut chauha dah hmasa lo hian, keimahniah kan vote hmang leh kan nun dan hmang ngei hian kan siam ṭha hmasa tur a ni ang.

- Rs Zuala Renthlei