Restricted tender chungchang kha

Vanglaini lama John L Hnamte thu ziak 'Restricted Tender hi ṭhalaiten vei a ngai' tih kha kei ṭhalai hian a vei chu ka vei ve reng a, ka vei thu hetia ka sawi chhuah mai loh hi chu keini ang ak zat hnih hnuai lam rawng lo lehnghal tan chuan tih theih a awm si lo hi ka na vawng vawng a ni. 

Khami ṭuma a thu ziak kha a ngai ngaiin han khar chhawng nawn leh ta ila, mahni thiam ang angin conclusion siam ve leh ta bawk ila. Chu chu keini ang mi mawlin restricted tender a contract inpekin kan ram a tih chhiat dan kan sawi chhuah ve thiam dan chu a ni mai dawn a ni: 

"Chief minister Pu Zo­ram­thanga khan Assembly House-ah khan ZPM mem­ber C Lalsawivunga a chhan danah khan kum 2009 aṭanga August 31, 2020 chhungin restricted tender hmangin hna 53 pek a nih thu a tarlang a, hengte hi engtin nge kan ṭhalai lehkhathiam zawkte hian an khel loh theih le? Sorkar hna kan zawng luai luai a, mah se sorkar hnaa kan luha kan dam chhunga kan hlawh pawhin a phak ngai loh tur hi 'duhsak zawng' nih vang ringawt hian hna pakhat in pekah hian an hlep ṭawk ṭawk a, hei hi kan ram infrastructure in a tuar a, hei hi 'politics hi eizawnna' anga kan khelh chhan a ni ve leh chiah bawk a ni." 

"The Frontier Despatch chanchinbu September 7, 2020 a chhuak kha kan en chuan he sorkar kaihhruaina hnuaiah hian Department hrang hrang pariatah lek hna 100 chuang 'Restricted Tender' hmang vekin an pe chhuak a, chumi belhkhawm chu cheng nuai hlir 70,000 vel a nih thu an ziak a ni.

Cheng nuai khat tamzia hre tan chuan cheng nuai hlir 70,000 chu a tam dan tur han ngaihtuah ve ta ula, heng te hi duhsak zawngte hnenah Restricted Tender hmangin an insem vel mai mai a nih ber chu! Tender pangngaiin pe chhuak se, kan construction company hrang hrang leh hnathawk thei turten han chhang sang sang se, chutah chuan dik taka thawk thei tur an lo lang dawn a nih vei nen heti reng renga kan in vulh bik a nih chuan Mizoram hian nakinah a tuar dawn a ni." 

Khi laia thu khi Mizo ṭhalai lehkhathiamte khan lo chik ve leh deuh teh ule. Kan ramin hmasawnna atana pawisa a dah ve zawng zawng hi a chhang hniam leh a thawk thiam apiangin an thawh theih tur ni lovin, mi tlem te duhsak zawng bikte chauhin an thawh theih tur in an siam ta a nih hi mawle. 

Hei hi a nih ka ring tun laia Facebook leh Whatsapp vela ṭawngkam lar tak, "A hmu tur chiang sa hre tawh chunga tender chhuah" tih hi ni ang. Heti a nih chuan politics hi eizawnna lian ber (eizawngtu tam ber tihna lam ni lovin) a lo ni ta a, sum leh pai hausakna Chiahpuam dik takah kan sorkar hian a chan tir ta mek tihna a ni. 

Hna hmanhmawh thlak bikah chuan 'restricted tender' hi an chhuah a nih pawhin a awm ve tho mai. Thiam bik ngai pawh ni lova restricted tender an hmang hi chu duhsak zawngte hna pekna remchang a ni a, chu chu Mizo ṭhalaiten Korean Film, PUBG, Rap Battle leh Fashion Show aia kan vei a ngai. Kan future hi a chhe zo thei dawn a nia.