Taksa lumna hmangin electrict...

Khua a vawt ṭan, December leh January thla phei chu a vawt viau ang. Kan taksa lumna erawh kan in phelh sek viau emaw hnawng chepa kan awm a nih loh chuan pawnlam boruak ai chuan a lum a, pawn lam boruak vawt leh kan taksa lumna inanlohna hi electric siam nan hmang ila, ava ṭha dawn tak em!

Thermoelectric effect hi kan hria em aw! Alloy (metal inang lo pahnih emaw a ai tam inchawhpawlh) pahnih hmangin sawi dawn ang - Chromel leh Alumel wire hi an common a, heng pahnih hi suihzawm ila, an inzawmna pakhat, a khawi lam lam pawh meiah hem ila, a lehlam zawk kha vur emaw tuiin chiah vawt ila, lumna inang lo a lo awm ang. Hei hian electric voltage a siam thei - lumna inang loin electric voltage a lo siam theih dan hi Thermoelectric Effect chu a ni.

Kan taksa leh pawn lam boruak inang lo hmang hian Thermo­electric effect definition-in a lo sawifiah tawh electric voltage chu kan siam ve thei reng a lo ni. Kan thawmhnawah hian Thermoelectric Generator (TEG) ang chi hi lang si lo hian phum thei ila (thawmhnaw a bik taka siam, a chhung lama electronics thil dah theih turin siam ila) LED watt hniam ber chi hi chu battery ngai miah loin a tih en ve theih dawn a ni. Mahse thil awlsam lutuk a ni lem lo a, electric voltage kan generate pawh khi electronics circuit ṭhenkhat hmangin step-up a la ngai a ni hman tlak tur chuan.

LTC3108 hmang hi chuan thil theih a ni a, hetiang Thermo­electric Generator-in voltage hniam tak a pek chhuah hman tlaka lo siam remtu electronics circuit ti ila a awlsam ber ang chu.

LTC3108 hmang pawh hian electric voltage sang tak a la nih dawn loh avangin, light-ah pawh watt hniam tak chauh a ti eng thei dawn a, mahse battery a ngaih dawn loh avangin a la hlawkthlak tho a ni. Thlasik zan khawvawt lutuk thim siah kawng vel chhun eng thei a nih chuan a ṭha phawt.

Khua alo vawh leh takah chuan hetiang te hi ka han nghaihtuah a, a tlangpui chauh ka rawn sawi a ni. Ka sawi takte hi Youtube velah te lo en ve chin ula, thil interesting lutuk a ni a, thil tih theih a nih bakah, Hnamdang chuan kut a ken theih tura siamin, kut lumna leh boruak lumna inang lo hmang hian flashlight te pawh an lo siam tawh a ni.

Politics leh koh­hran lam article hi ziah kan hrat a, Science lama tui mite hian ti lam hawi hian thu leh hla han ziak ve ṭhin sela, naupang bright tak takte a ti phur thei ang!

Mizo zingah helam ngaihven kan awm ve a ni tih fiah nan ka rawn ziak ve thawr a ni. Kei , a hminga engi­neer zir, la pass chhuak lem lo hian.

- Lalawmpuia Fanai