Thisen pek leh VBD Award

Mizote zingah mi ṭanpui duhna te, mi dang tana malsawm­na thlentu nih duhnate a awm zel a, chuta tan chuan thisen pek pawimawhzia hria pawh kan pung zel a, a lawmawm hle. Thisen pek hi sum leh pai sên ngai vak loa mi dang tana malsawmna nih theihna a ni a, mi ṭanpuina ni satliah mai loin, nunna hlu tak chhan theihna a nih avangin uar zel ila, intihhmuh zual zel ila a duhawm hle.

Kar hmasa lawk, June 14 kha World Blood Donor Day a ni a, Aizawl leh district khawpui hrang hrangah hman a ni. World Blood Donor Day hi Mizoramah chuan thisen petute chawimawina ní atan hman a ni ṭhin a, tun hma aṭangin pawl hminga thisen pe ṭhate hnenah Association for Voluntary Blood Donation (AVBD) chuan chawimawina, Voluntary Blood Donation (VBD) Award a hlan ṭhin a, kuminah pawh a hlan leh a ni. Aizawlah chuan Civil Hospital, Aizawl leh Synod Hospital blood bank-a pete bik chhiar a ni a, district dangte AVBD branch-te pawhin an district ṭheuha blood bank-a pek zat aṭangin VBD Award hi an hlan ve ṭhin bawk.

AVBD-in World Blood Donor Day-ah VBD Award a hlan chhan bulpui chu - thisen pe ṭha pawlte chawimawina leh lawmthu sawina atan te, pawl hrang hrangin thisen pek an uar zel theih nan leh Mizo ṭhalaite'n thisen pek duhna thinlung an neih zel theih nante a ni. Hetih lai hian, AVBD-in thisen pe ṭhate hnena award a hlan ṭhin­ah, a bikin kohhran ṭhalai pawl­te hnena award pek dan hi mi ṭhenkhatin an hrethiam tâwk loh deuh a a ni mai thei a. Kan hriatthiam theih nan sawifiah deuh i'n tum teh ang.

AVBD-in kum tina VBD Award a hlan ṭhin hi category pali-ah ṭhen a ni a, chungte chu - Religious (kohhran pawl hrang hrang ṭhalaite a huam), YMA (YMA hminga pek zawng zawng a huam), Institution (zirna-in zawng zawng a huam) leh Miscellaneous (pawl ni si, category hmasa pathuma tel lo zawng a huam)-te a ni. Heng category hrang hranga award pek ṭhinah hian, a petu pawl leh an pek zat chhiar danah huam chin (area) nei a ni a, hun chhung (financial year) nei a ni bawk a.

Religious Category

Religious category-ah hian Mizorama kohhran pawl hrang hrang ṭhalai, pawl hminga thisen petu tawh phawt chu an tel vek a, pe tam ber aṭanga pathumna thlenin award pek a ni ṭhin. Huam chin (area) nei a nih angin, Mizoram puma KṬP branch/bial zawng zawng pek belhkhawm emaw, ram puma ṬKP unit/ bial/coordination zawng zawng pek belhkhawm emaw a ni lo a, kohhran pawl dangte pawh, ram pum huapa an pek belhkhawm zat aṭanga teh a ni lo.

KṬP branch/bial pakhatin an pek zat te, ṬKP unit/ bial/ coordination, SAY corp/ divi­sion, etc.-in an pek zata teh a ni. Chutih rualin, financial year khat chhunga mi a nih angin, kum khat chhunga vawi khat aia tam pete chu an pek zat belhkhawm a ni thung.

Kum 2017-18 ah chuan Reli­gious category-ah hian ṬKP Coordination, Aizawl-in an pe tam ber a, Territorial SAY-in an dawt. Area bik neia thisen pe tam apiangte hnenah award hi hlan a ni. Chutih laiin, KTP-te tan Central KṬP-in blood donation calendar an siam a, calendar anga pe branch/bial eng emaw zat awm mah se, branch/bial hminga pe an ni deuh zel a; chuvang chuan Religious category-ah hian tun hnaiah chuan award dawng pha khawpa pe tam an awm ta meuh lo. Entir nan, Mission Veng Branch/Bial KṬP hian kum tin thisen an pe deuh ziah a, mahse, an pek zat chu award dawngtute pek zat aiin a tlem ṭhin a; award dawngtute pek aia tam pe ni se chuan, Religious category-ah award hlan mai tur an ni ang.

Hetiang hi ni mah se, KṬP-te hi pawl ang chuan Mizorama a thlawna thisen pekah a thawh hlâwk ber an ni a, kum hmasa lamate pawh a thawh hlâwk ber, pe tam ber an ni ṭhin a (Mizoram puma bial/branch ho pek zawng zawng belhkhawmin). Kum 2017-18 ah pawh KṬP branch/bial pek zawng zawng (donation camp 112-ah) belhkhawm chu unit 3,636 lai a tling a; a hnaih bertu chu NSS niin, NSS unit hrang hrangte pek zat chu unit 3,110 a ni. Kohhran ṭhalai bika KṬP-te pek zat hnaih bertu chu ṬKP niin, donation camp 48-ah unit 1,856 an pe a ni.

KṬP-te thisen pe tam ber an nih laia KṬP branch/bial zingah Religious category huanga award dawng pha an awm lo ṭhin si hi AVBD chuan a vei em em a. Chuvang chuan, kum hmasa lamah chuan Special Award hlan ṭhin an ni a, hei hi Mizoram pumah thisen pekah a thawh hlâwk ber leh pe tam ber an nih ṭhin vang liau liau a ni. Kumin 2018-a World Blood Donor Day hmanah erawh chuan Central KṬP hruaitute ngaihdan hre chungin Special Award hi hlan a ni ta lo thung.

KṬP hi Religious category-ah telh an ni lo em ni, tia zawh­na a awm leh ṭhin a. A chunga sawi ang khian, KṬP-te hi Religious category-ah an tel a, an tel mai ni loin, religious an ni sa hrim hrim zawk a ni.

Tlipna

Sawi tawh angin, AVBD-in blood donation award a hlan ṭhin chhan bulpui chu Mizo ṭhalaite leh pawl hrang hrang, thisen petute AVBD-in a ngaihhlutzia lantir leh a pe

ṭhate chawimawi a, a thlawna thisen pek a pun zel theihna atan a ni. VBD Award hi kan dawng pha emaw, dawng pha lo emaw, pawl hrang hrangte hian thisen pek uar zel ila, a theih phei chuan kum khatah donation camp vawi 2/3-te nei thei ila a duhawm hle.

Pawl hrang hrangin blood donation camp kan neih hian, AVBD-in award a hlan ṭhin tláwmtê dawn beiseia pe ni lo ila; kan lo pe tam ta viau a, award kan dawng thei ta a nih leh a lawmawm a ni mai a. Mi dangte ṭanpuina duhna te, mi dang tana malsawmna thlentu nih duhna leh mi nunna chhan theitu kan nihna hre chungin, chutiang rilru pu chuan donation camp uar zel ila a ṭha awm e. Chutih rualin, Mizo ṭhalaite'n blood donation camp-ah chauh thisen pek tum loin, kan pek theih hun apianga blood bank-ah kalin thisen pek uar zel ila, regular blood donor nih i tum ṭheuh ang u.

- K Zothanpara, Secretary (Info), AVBD