Traffic SP thupek chhuah ka thlawp

Aizawl Traffic SP chuan hmanni lawk khan tlan dan tur thupek a chhuah a, double overtaking a khap bakah line pela tlan a khap bawk. He thupek hian Aizawl khawpui pawh a timawi a, mi chuhhelh deuhte vanga harsatna pumpelh a ni dawn ta bawk a, a lawmawmin SP thupek chhuah hi ka thlawp tak zet a ni.

June 3&4 Vang­laini issue-ah hming dangin 2wheelers khalhtu polite lohzia leh harsatna an thlen ṭhin dan ka ziak a, double overtaking pawh khap ṭul ka tihzia ka tarlan bakah traffic police-te hian heng mi chuhhelh lutuk ho lakah strict deuh tura ka duh thu ka ziak a. Ka duhthusam mai ni lo, khawpui lirthei khalhtute leh mipuite himna a nih vangin SP zahawm tak chuan dan hmangin thu­chhuah a siam ta a ni.

Traffic SP-in thu­pek a chhuah hnuah chuan khawpui chhungah 2wheelers khalh pawh a nawm phah hle. Kha thupek kha zawm a hlawh em em a, a hma kha chuan rem leh rem loa mahni hmaa mite tlan pelh thawt thawt kha a tam hle a, intihpalh pawh a hlauhawm viau. Line-a traffic jam kan nghah mek laia hmanhmawh leh polite lo fal bik vangin 2wheelers khalh ve pawh kha a hrehawm thei em em a ni.

Thupek chhuah a nih hnuah zawm a hlawh hle a, hetianga thupek chhuah zawm hlawh leh zah hi a tam bik lo ang. A hma pawh khan polite taka mahni hmaa mite zui zel an tam em em a, mi tlemte khalh thawt thawt khan khawpui pawh a ti zahawm lo a, tunah chuan zia­awm tak a ni.

Kan sawi fo tawh a, India ram khaw­pui dang angin horn kan hmet ri ve vak vak lo takte hi lirthei khalhtute a ti zah­awm a, khawpui a ti zahawmin a timawi em em a ni. Hei hi mitin ten kan chin zui zel a ṭha khawp mai. Aizawl khawpui chu ‘City of silecne’ ti hiala phuah tlak a ni. I ching zawm zel ang u.

Hei bakah hian lirthei khalhtute vang hian khawpui mawi leh mawi loh te, kan hman zia leh kan hnam nun a hril em em a, chu chu kan hriat fo a ngai khawp mai.

Tin, city bus leh taxi hian kan khawpui nunzia an keng hle tih an hriat fo a ṭul khawp mai. Bus-ah hian aia upa zahna lantir hi a mawi em em a, tunlai hian ṭhangthar ṭhenkhat­te'n upa zah nachang hre lo an awm nual mai. Hei hi nu leh pate pawhin tu leh fate fuih nan hmang fo se a duhawm hle.

Taxi pangngai bakah 2wheelers taxi a tlan ta a, kan taxi chi hnih khalhtute pawh hnamdang leh mikhual lakah hawihhawm chhuah hram hram se a duh­awm khawp mai. Taxi fare uchuak taka lak chingte avang hian kan hnam a mualpho duh viau.

Kan traffic police-te hi an hawihhawm ta hle mai, kan khawpui an ti zahawm viau. Mikhual emaw, lir­thei khalhtute lakah emaw pawh an che nalh viau mai. Kei hi traffic police leh lirthei khalh­tute chik mi ka ching a, an police dan leh lirthei khalhtute laka an chetzia a mawi khawp mai.

In vin khur khur ang chi kha ka hmu ta mang hauh lo. A lawm­awm tak zet a ni.

- Lal Rinmawia