LENGPUI AIRPORT CHEI THAT MEK RTI ZAWHNA CHHANNA ( ELEVATED ROAD HNA THAWH DAN HIAN NGAIHTUAHNA A TI KAL THUI DEUH)

Lengpui Airport chei ṭhat hna thawh mek hi PWD Project Division III hnuaiah contractor pahnih; Pu Zoramchhana, Electric Veng, Aizawl leh KR Consruction, Pu Kamlova Chhangte, Ṭhuampui, Aizawl (Pu Kamlova Chhangte hi hnamdang niin a hming Kamrul-a a ni a, Mizo hming a nei niin an sawi - VNT) te an ni.

Lengpui Airport chei ṭhat hna thawh mek hi funding source chi hrang pahnih Special Central Assistance (SCA) funding leh North East Special Infrastructure Development Scheme (NESIDS) funding aṭanga thawh a ni a. Pu Zoramchhana hian SCA funding hnuaia hna hrang hrang - Earth works, Dismantling Item, PCC works, RCC works, Brick Walling, Plastering, Tile Flooring, Ceiling & Panneling with ACO Board, Painting, Railing (Stainless Steel with Tuffen Glass), Door & Windows fittings, Temporary Laminated Board Partition, Roof Treatment, Sanitary Fittings leh Sub-Surface Cabel Channel siam hna te a thawk a, project ammount hi Rs. 14,49,74,927.00 (cheng vaibelchhe sawmpali, nuai sawmli leh pakua, sing sarih, sangli zakua sawmhnih pasarih) a ni.

Pu Zoramchhana hna hi special assistace fund aṭanga thawh niin 26.02.2021 khan work order pek nih thu RTI chhannaah hian tarlan a ni.

KR Construction (Kamlova Changte) hian NESIDS funding hnuaia hna hrang hrang - Construction of Elevated Road, Construction of Departure Ramp (2 Nos), Extention of Baggage Make-up Area, SITC of MRV/VRF Centralised Air Conditioners, Internal Electrification of Terminal Building, Underground Cable (XLPE/PVC) for First Floor Conveyer Belt siam hnate an thawk a, hemi atana project amount hi Rs. 19,59,00,000.00 (vaibelchhe sawmpakua leh nuai sawmngapakua) a ni.

KR Construction hian April ni 21, 2021 khan Airport tualzawl nawr fai hna an thawk ṭan a, hemi ni aṭang hian ngawrh takin elevated road sak hna hi an thawk cho ta niin mi rinawm takin min hrilh.

Hetih mek lai hian KR Construction hnenah he hna thawk ṭan tur hian 20.09.2021 khan 'Improvement/Upgradation of operational/non-operational facilities of Lengpui Airport(Sh: Elevated Road with connected component of Terminal Buiding) work order hi pek a ni chauh a. (No.B.20011/43/CE-BD/PWD/2019/68) Pu Kamlova hian work order nei lovin thla nga vel hna a thawk hman tihna a ni.

Hetiang hna lian tham hi engtin nge work order awm lova hun rei tak an thawh tir theih? Tu thua thawk nge tih leh terms & agreement engmah ziak awm lova sum tam tak senna hna kalpui hi a mak hle a ni.

Dan lo-a contract lo thawh tir tawh regularise na'n restricted tender a hmingin an ti leh mai niin a lang ta ber a. Sum tam tak senga thla tam tak lo buaipui tawh hi tuman an lân thei dawn lo tih a chian avangin, a duh duh zat zat rate-in tender chu a chhang tawh mai dawn tihna em ni ang?

- Vanneihthanga