KA LO LÂM LEH LAWK

Mi thuziah tuihnih pawh tih tawh nak alaia mahni thuziah han tuihnih leh chu a inthlahrunawm angreng viau na a; a ṭul miau bawk si. June 06, Vanglaini-a Vanglaini article ka tuihnihnaah khan ziah sual a tam em em mai a, ziah dik loh chiang tak mai pathum ka nei a.Vanneihthlak takin Vanglaini lamin min tihdiksak vek a; ka mualpho lo a, ka lawm hle. Chutih rualin, ka duh dan taka ka ziah 15 chuang a dik loin a lo awm ta thung a; tu ma’n ka ziah dan a ni lo tih an hre tawh si lo a, a zahthlak!

A zavai chuan kan sawi sêng lo ang a; ‘hetiang leh he tiang’ tiaa inzawm leh zawm loa ka dah lo inzawm fel ta thên te;‘heng nuho’ tih aia ‘hengnu ho’ tih ni ta te; ‘hranpa’ aia ‘hran pa’ tia an pawh ṭhen leh lawi si te; a inzawm loa ‘dik hlel’ leh ‘fel hlel’ tia ka dah rawn inzawm fel ta êt mai te;‘ṭawngkam azir’ tih tura ‘ṭawngkama zir’ tih te; ‘tun hma’ ka tih ṭhat ve reng reng ‘tunhma’ tiha lo chang ta te; ‘nghakhlel’ awmzia a khingbai a khingbaia ka sawi fiahna, ‘nghak hlei thei lo’ ka tih, ‘nghakhlel thei lo’ tia lo inthlak ta mai te kha...ka mail ka check leh pawhin hetiang hian ka ziak hauh si lo a; ṭhenawm naupang harhin an lo tichingpen a nih ka ring; a taimakthlak hlein ka hria.

Mi thuziah kan tuihnih naran mai lo a; ziah dan dik kan khel tel a; ziah dan dikah chuan ziah zawm leh zawm loh a pawimawh em em a. Mi tu pawhin ziah dan dik chungchang an ziah tawh chuan an thu ziah chu duh duha lo ziah zawmsaka lo phel darhsak mai mai chi a ni lo tih chu kan hre thiamin ka ring a. Vanglaini lam an taima a, min endik uluksak viau na a; an ṭhenawmte’n min han tidanglamsak vak mai kha chu...! Mahni lo maha zahzum tawh nak alaiin, kan thu ziah ve chhun kan thawn dawn pawha maimitchhing chunga ‘send’ chhu kauh ṭhin, chanchinbu lama a chhuah pawha keu fuh ṭha mai ngam loa keu kan deuh zuau zuau ṭhin tan chuan, ziah dan dik sawi ve sia mahni ziah dan ni lo hlira a lo chhuak ta mai kha chu thil zia lo tak a ni.

A tir lama ‘khaw nge’ tih te, ‘khawnge’ tih te, ‘khawiah nge’ tih te leh ‘khawi nge’ tih te kha, a enga pawh kha a inzawm fai ta deuh vek mai bawk a, kha phei kha chu a ziaktu tan pawh han chhiar leh khan hriat thiam hleih theih a ni tawh lo. Pakhat chauh tar lang teh ang, “’Khaw’ tih thumal hi zawhna ṭawngkama a awm ve hranpa hrim hrim a nih chuan ‘Khawnge?’ tia ziah a dik ang; ‘Khawnge’ tia thumal pakhat anga ziah erawh a dik lo,” tih a ni a. An edit dan aṭang hi chuan a ziaktu hi keimah leh keimah ka inkalh nghal tlat, a inzawm ve ve miau avangin. “A chiang lo, Lelte, va lâm leh rawh,” tih chu nêp tê.

Hman deuh khan an sawi ṭhin a, “Samsung tih hi a ṭhen chuan ‘Samsung’ tiin an lam a, ṭhenkhat erawh chuan ‘Samsung’ an ti thung a. Sapho khuan ‘Samsung’ an ti deuh ṭalh a; anmahni Kawre-ho chuan ‘Samsung’ an ti daih. ‘Samsung’ tih hi a dik lo a; ‘Samsung’ tih zawk tur ni,” tih ang chauh kha kan ni ta mai a. Tun hnuah chuan Mizo ṭawng ziah dan chungchang thu reng reng chu, tu ziah pawh ni se, tute ṭhenawm mah hian lo edit tawh lo hram se.

Ziah dan dik lo a awm chuan a ziaktuin mawh a phur tur a ni ang a; thu ziak ṭhin mi tinin chu chu an huamin ka ring.

- Rempuia R. Lutmang