Fak rawh u, Mihringa chu
Mihring leh a mihring puite inkara nunhonaah hian, fakna thu a awm a, sawiselna thu a awm a, fak leh sel inṭawm fakselna thu a awm bawk a; indiriamna thu pawi a awm bawk. Fakna hian thil a ti thei hle a, a lehlamah chiah mi dang dêuna hian nun a hruai hniam thei bawk. Fakna ri hriat ngei ngeina huna fakna thawm hriat tur awm miah lo hi eng nge a chhan ni ta ang?
Vawiina Mizote kan nunho meknaah hian fakna ri aiin sawiselna ri a tam ta zawk em tih hi chhut neuh neuh tham a ni ta. Fak tur kan fak hreh chhan te, fak tur an awm laia kan fimkhur riau chhan te, sawiselna leh kher hrâmna kan zawn ṭang ṭang chhan hi a chhan chhut chhut ila, politics-a inbeihna leh politics huang chhunga elpuite fak a rem lo nia an ngaih avanga an inbeihna kan hriat tam lutuk vang a ni em tih hi ngaihtuah ngai a ni ta.
He rilru aṭanga chhuak politics-a inbeihna hi kan hre nitin a ni ber a. Chu chuan kan nun hi thui tak a kaihruai a, an tih dan entawnin fak tur mihring chu fak loh dan hram kan zawng a, fak tlak a nihna lai chu hai hliahin fak lohna tura a tûr pai hmuh ṭalh kan tum a. Minister ṭha leh chak, taima leh entawntlak te, Ruling leh Opposition- ah pawh MLA fel leh vengva, ram inrelbawlna ṭha ngaihtuah taima pawh an awm tur a ni. Mi ṭhate fak thei loa kan awm chhan hi kan hmuh leh hriat tam ber politics a inbeihna thawm nghawng a ni em tih hi chhut tham a ni ta fo mai.
Eizawnna kawnga thawhhonaa pawh hian fakna hian eng chen nge hmun kan chantir aw? Fakna thawm hriat tur awm si lo a, engtik lai pawha tihtur inkawhhmuh rengna hian chawlawlna, ngui leh nguaina a siam foin a rinawm.
Sorkar office a ni emaw, YMA leh kohhrana kan thawhhonaah a ni emaw, Company a kan thawhhonaah a ni emaw, khawi hmunah pawh ni rawh se; mahni thawhpuite thil ṭha tih te, kan hnuai a mite leh kan pute thil ṭha tihte hi kan infaksak fo tur a ni dawn lo'm ni? Fakna hi hrilhfiah thar a ngai lo a, a dawngsawngtu zawng zawng tana ri ngaihnawm a ni a, phurna a keng tel miau avangin nunhonaah hian thu hlu leh ri mawi a tling a nia.
Naupang hian fak an lawm a, fakna ri vangin an ṭah mittui pawh a luangkir hial a ni lo'm ni? Tarkun khup biha damte meuh pawhin fak an lawm a, nui hmelin a zawm ṭhin an ti em ni kha? Chu mai a la ni hleinem, min siamtu kan Pathian meuh pawh hian amah fak turin min duh a nih hi.
He Fakna thu kan tlangaupui hi thu ho tê anga lang, har ru deuh a ni thung! Mi dangte chawimawi a, an thil ṭha tih fak tur hian mahni inphahhniam ngam a ngai a, tlawm a ngai bawk. Chu chu mihringte hian har kan ti hle thung.
Kan miziaa a ṭha zawk zel phawrh khawmna aṭangin khawvel nuam zawk hi a siam theih reng a nia. Faknaah hian inbawlna mawi lo tak hi zep lut tel lo thung ila. Mi ṭhate chawimawi ngam lo khawpin politics hi rui â bulh lo ila, fak phute fak ngam lo khawpin huaisenna tlachham lo ila, fakna thiltihtheihzia hre chungin fakna thawm hi ri tam se la, nunho a va nuam dawn em! A ni, fak rawh u, mihringa chu.
- Lalnunṭawma Fanai