Kuhva tawlh insawithiamna

Tunlai chu Mizo­ram chhunga sawi hlawh ber ber chu kuhva tawlh ruk a ni. Dan lova tawlh, dan phuahchawp tak hmanga kan lo rin luh mêk sawi mawina hi hmun tam takah chhiar tur a awm.

Mizoram sorkarin lockdown vanglai pawha GST lama sum lakluh hniam lova a kal thei kha khawvel thil mak zinga chhiar tur a nih laiin kuhva hmanga GST aṭanga sum luh dan hre tán chuan thil mak tak a lo ni lem lo.

Khaw chhak thil ni chiang sâ, an tharna hmun pawh sawi chian awm si lo, eng lirthei hmangin nge Myanmar a lo luha engtin nge Myanmar aṭangin Mizoram a lo luh? tih reng reng kan hriat si loh avangin dan anga lâk luh a ni lo phawt a, chu chu smuggling tihna a ni.

Ram leh ram inkara document awm lova insumdawn tawnna hi sawi mam leh sawi mawi theih a ni lo. Pawisa lama a hlawk avanga kan sawi mawi dâwn a nih chuan ruihhlo tawlh pawh a hlawk a, rangkachak leh ralthuam tawlh pawh a hlawk ti law law ila a ṭha lo maw? tih zawhna hi chhan lo tum ve chhin ta che u.

Kuhva hi an man ṭha duh lo an ti. An man chhun te pawh hi an man hlen tak tak lo an ti, chu ti tehnuai ni si chu Assam Rifles hian a nuai tam tak tel kuhva rah hi an man ve reng bawk a, kuhva tawlh ruk ni si man theih leh man theih loh awm hi thil mak tak a ni.

Sorkar hnathawk Taxation Department lam leh Police lama kuhva tawlh support ve tlat leh insawi thiamna dan tlawh chhan pial deuhva sawi thei hi an awm ta fur mai. Social media-ah pawh kum thum vêl kal taa kan dem rawn kha tunah chuan kuhna tawlh ruk lama ṭang hi an pung thar hluai a ni.

Zawhna mawl tak tak kan neih ṭhin chu "Thil dik leh fel fai tak ni se manual labour muṭia mai pawhin zan khata sang hnih chuang a hlawh theih chuan hna dang tunge thawk peih ang?" tih a ni. "Heti taka hlawk tur hian Kuhva chauh ni si eng ang em emin nge a hlawk?" tih a ni leh bawk. "Kuhva tawlh mai mai kan tih chhunga kawng an lai chawp ngam sak sak te hian sum in phum ruk dan a entir a, chuti taka hlawk chu eng anga rin tur nge?" tih zawhna kan nei a ni.

Kuhva tawlhho vang hian Aizawla in hmun zawng zawng pawh a to ta ṭawlh ṭawlh mai si hi 'kuhva rah tawlhin min nghawng lo' i ti tawh lovang u. He thil hi politician thlenga hming sawi rik faih faih a nih dan te, kan tlawmngai pawl lian pawh an ngawih kur dan pawh hian ngaihtuah a ti thui hle a ni.

Kan legalize a ni rau rau a, chuti taka sumdawnna lian a nih chuan a ram pum hian tawlh dan 'legalize trade' hlawk em em mai hi i bei law law ang u hmiang? Central sorkar pawh a läwm ang chu! State own resource pawh nei lovin dan ang thlapa sumdawnna hlawk kan nei dawn a nih chu.

Chuti a nih loh chuan GST lo lâk mai sawi mawi kan intih hmuh chho hi kuhva mafia an tih te thu hnuaiah kan lo kun tlâng tawh zawk tihna em ni? He thil hi a mai mai lo tawp a ni.

- Zonunsanga