Kuhva tawlh rukah Kan tlawm em ni?

Tunlai chanchin ngaihven hlawh tak dan lova ram pawn aṭanga kuhva lo lut, Mizoram a lo luh aṭanga dan anga tawlh anga kan chan tir dan leh chumi kal zela Champhai District khaw tam taka environmental/ forest clearance dan lova PWD pawh hriattir lova duh duhnâ hmuna ual taka kawng an sial chungchang, Mizo­ram sorkarin hmù reng chunga a hmuh loh der dan kimchang hi Aizawl aṭang hian hre ve mah suh ila, mi titi leh document hrang hrang leh Aizawl in hmun thleng thlenga a nghawng takah chuan good citizen tih duh vang tal pawhin kan au chhuah a ṭul ve ta a nih hi.

Economics lam hi hre ve mah suh ila thil pakhat aṭanga hlawk uchuak taka sum a luh thur thur chuan "A neih ka ei lo," tia kan insawi fihlim ṭhin dan letling chiah hian mi neih hian min ei let mêk a ni.

Champhai Dis­trict chhunga dan lova kuhva lut khaw­tlanga "A hlawk em alawm" tia kan buaipui vut vut hian tunah chuan Mamit District chhunga kuthnathawktute a nghawng ta si a. Kan sorkar kut­hnathawktute lam ṭang hian Champhai District chhunga smuggling nge a dah pawimawh dâwn Mamit District kuthnathawktute? tih hi zawhna piang thei a lo ni ta phawt mai.

Khawtlang hruai­tute hian mahni rama sa chhuak pawh an hre lo ngai lova, Myan­mar ramria khaw tam tak hian an khaw rama dan lova kuhva tawlhna tur kawng an sial hi an hriat pui a, chu mite chu Village Council an nih chuan India sorkar dan anga thlan tlin an ni.

Dan lova sum­dawng turin kan elected represen­tatives rual hian village level-ah ṭan an khawh a nih tawh chuan, he thil nghawng chhe tak tuar a duh a nih loh chuan Mizoram sorkar hian dan a lek kawh a hun tawh lo maw? Police kan neih ṭhep ṭhup te hi kan rin ve tehlul nen, kan Champhai kawngpui tichhe thei khawpa kuhva phur lirthei inzui ngai nguai hi an thlir liam mai mai ang maw?

Mi tam takin an koh eih zawh tawh lo YMA pawh khawiah nge a awm tâk? Khawnge kan sorkar a awm tâk? Kuhva tawlh ruk hlawk tâk hian min tlawm tawh em ni le? A hlawk em avanga sawi mawi chawpa lut dial dial kan nih dâwn chuan, Khehpuam pawh kha sawi mawi leh ila? Rangkachak te hi tawlh dial dial ila, kawngpui kan rap chhe lo zawkin Mamit District Kuhva chingtuten an tuar lo zawk ang.

- C Lalthanpuia