MOTOR CAR NEIH HI A ECONOMIC LO (Aizawl Traffic Jam bawk)

Aizawl traffic jam reng mai hi eng dang vang mah a ni lo, motor tam vang mai a ni. Hun kha leh chen kha Aizawlah traffic jam lovin kan awm thei a, tun kum 10 kal ta vel aṭang khan lirthei a maka makin a lo pung a, chu chuan nunphung tikhaihlak khawpin traffic jam kan buaipui ta a nih hi. Eng vangin nge a kaw nazawngin lirthei neih kan tum? Thatchhiat vang nge? Chapo vang? Kan eizawnna atan ṭangkai leh mamawh ni reng reng lo eng zat tak Aizawlah hian motor car leh two wheeler awm ang maw!

Tun hma deuh, keini pawhin kan hriat chian em em hnuah khan chuan office kal turte bazar kal turte reng reng kein kan kal suau suau a. A nei fate leh sorkar motor dawng pha chin tlem te tih loh kha chuan lirtheia kal kher an tum lem lo. Tunah chuan apui anawiin lirtheia veivah kan tum ta mai hi a mak a ni. Mithiamte chuan, taksa hrisel tak nei reng tur chuan kea kal tam a ṭul an ti. Kea kal hi exercise ṭha tak a ni a, thisen kal a tiṭha a, mi a tihriselin, mi a tiharhvang ṭhin. Chaw paiṭawihna puitu ṭha tak a ni an ti. Tunlai hunah chuan kein kan kal tlem a, kan dul a kiar a, kan chak lo va, kan hrisena a ṭha lo va, stroke leh zen thutna a tam a, thisensang leh zunthlum an pung a, kea kan kal tlem avanga nunna tawi ta eng zat tak awm ang i maw!

Hrisel loh phahna bakah ṭul lova pawisa tam tak khawhralna a ni. Tun laiah motor car tlanglawn chu cheng nuai nga (5) aia tam deuh vek a ni tawh. Kan chhungkaw eizawnna atana pawimawh em em pawh ni lem lo, kan han lei ve tawrh a, kan chhungkaw economy lam ngaihtuah miah lovin. A chhawrbawkna lam ngaihtuah em em lovin, a ṭhen phei chuan Bank loan lain. Registration a lo ngai a, garage a lo ngai a, petrol a ngai reng bawk a, parking man a ngai leh a, a himna a ngai zel a, rilru senna tur hlir a ni. A hlui deuhin repairing a ngai bawk.

Mizoram office pui MINECO-ah office dawrin kan kal a, gate bulah park-na a awm mai lo va, a chhak feah dah a; haw dawnah pan leh a ngai a. Ṭum khat driver hruaiin ka kal leh a, gate bulah motor park-na a awm mai loh avangin a remchanga park mai turin ka hrilh a. Office dawr zawhah driver ka be pawp mai thei si lova, zawn fe hnuah kan intawng ta hram a. Khangte ai khan public transport (taxi) in emaw kal ta mai ila, haw dawnah pawh engmah enghelh ngai lovin taxi lak leh mai kha a remchang zawk em em a ni. Chutiang bawkin bazar tur leh doctor rawn tura kan kal ṭumin khitiang harsatna tho khi kan tawk - buai lohna turah kan buai fo.

A tira pawisa hlawm cheng nuai 5 kha chu thuhran petrol leh hun leh tha sen ai khan Public transport-a kal a, haw leh mai kha a manhla zawk em em a ni. In lamah lah hmun ṭha lai luahtirin sum thuninu, min tibuaitu kha hûn ve reng a ngai si. Inchung leh hnuaiah dah ve lah a rem ṭeuh si lo. Kawngan hmun ṭha lai luaha dah ngai, man to tak kan hung reng mai zawng a nih hi. Thawhchhuah neih chu sawi loh dawr remchang tur kawng anah kan dah a ngai si a. Dahna nei lo tan lah vantlang kawng bik/dalin kan hung ṭhup mai bawk nen; mi kan ṭha a, a zuva lo hlauh zawk a. Vairam chu ni se a car chawpa a bo loh pawhin a ke (tyre) tal a bo ngei ṭhin. Heng zawng zawng pumpelh tur chuan Public Transport hman uar hi a him zawk a, a senso a tlem ber zawk ngei ang.

Aizawl-a two wheeler tam zawk hi tangkai tak a hman an nih loh a rinawm. Tunah lah mi nazawngin neih kan tum ta bawk si, khawi kipah hmuh tur a inhung del dul mai si. Zokhua lama mite chuan feh nan tal an hmang ṭangkai asin maw le. Chuvang chuan inngaihtuah harh a hun e. Kan hriselna tichhetu boruak ṭha lo siamtu a ni.

Delhi-ah chuan boruak a ṭha lo khawp a, hriselna tana hlauhawm khawp a ni a, Supreme Court inrawlh ngai hial a ni ta. Sum thuninu, kan nihna ang min nih phaktir lo zawktu neih vek tum ai chuan khawi ilo kalna atan Public Transport (taxi leh two wheeler taxi) hman uar zawk ila. Taxi te lah mamawh aia tam kan nei a. A theih hram chuan ke ngeiin kal tam I zir ṭha leh ang u.

- Zika, Falkland veng