ZAWHTE (CAT) HI

Kum 1963 – 1965 khan kan veng Thler tawi Khawruhlian Street ah Pu Thangzika(L) MNF MP ni ta hian Zawhte hi a vulh tam hle ṭhin a. Pawl 4 leh pawl 6 kan Headmaster Pu Lalrinchhna hian MNF rammu lo chhuah a, Minister a nih laia Interview ka va neih ṭum khan ka pu thu min zawh chu – Khawruhlian Thlertawia Pu Zika ten Zawhte an neih, an vulh kha ka la hrereng a ti.

Zawhte hi an mak bik em em a, Mi ngilnei deuhte hi an hre riau va, anmahni duattu leh duat lotute hi an hrehrang riau va. Mi ngilnei vak lo inah chuan an awm ṭha duh miah lo. Chutihrual chuan intihneitu bik em em a theih loh chin an awm thung a, a chang chuan an insawn leh daih ṭhin a. An naute neihte hian an sawn kual nasa ve ṭhin hle a ni.

Ka pi Zarkawta mi Sapsiami W/o Lalchungnunga BA, BT, Mizo zinga BT hmasa ber hian Zawhte hi a duatin Mihringte ei ang ang a pe ṭhin a, kum 80 chuang a nih thleng hian a room pindan leh khum laizawlah hian Zawhte pangate hi an awm ve ṭhin. Ka pi hian a ngainain a duat hle ṭhin a, khawi ngam theih loh nia an sawite pawh hi a khawi ngam leh mai ṭhin.

Hmanlai chuan Zawhte hian nunna pasarih a nei an ti ṭhin a, Zawhte thi tawh Daipawna an paihte hi an rawn nung leh ṭhin an ti. Tak tak a nih leh nih loh chu ka hre lo. Ui leh Ar angin an zun leh ek hi a hnawksak ve lem lo va, an inthiarnate an hai vur leh ṭhin a, ransa che thianghlim tak an ni.

Zawhte hi kan Bible Genesis aṭanga Thupuan inkarah hian a hming ziah lanna a awm lo niin an sawi a, a dikin a rinawm. Missionary hmasa Pu Buanga kha Mizorama Zawhte khawi ngam a, in chhunga la lut a, vulh hmasa bertu nia hriat a ni. Kan tarlan tawh ang khan Zawhte hian Duattu an hriain mi nazawng Inah an ngam bik kher lo a ni. Ka tute zingah pawh Zawhte ngaina leh duh em em a awm a, pindan khawi hmunah pawh a hruai lut thei a ni. Pu Hruaitluanga Ralte in Zawhte chanchin a ziahte hi a ropui hlawm hle mai a, a rawn tarlan pakhat BC 3100 Isua pian hma aṭanga lo awm ve si Bible, Pathian Lehkhabu Thianghlima a hming a lang miah lo leh a lanna awm miah lo hi a va mak em!

Hmanlaia Thlanmuala thlahrang ṭap ri nia an hriat ṭhinte hi Zawhte tap ri a ni duh tlangpui a. Zawhte nu leh pa inchhaia an ṭap ri hi mihring ṭap a ang thei hle a, zanrei lama an han ṭap chu mi hi a rap lek lek zawk a ni. Tam tak chuan an hlau ṭhin viau nghe nghe a ni.

Kan sawi tawh ang khan Bible-ah hian rannung leh ramsa hming tam tak an ziah laiin Zawhte ziahlanna a awm miah lo hi a mak ve hle mai a, mi thil chik mite leh chhiarzau deuhte'n an hre maiin a rinawm. Isua pian hma daih tawh aṭanga awm tawh leh an lo vulh tawh ṭhin a ni a, hnamdangte pawhin Zawhte hi chu an hre viau niin a lang. Tunlai hian mutpuite an ching ṭhin a, mithiamte sawi dan chuan Zawhte mutpui hi hriselna atan a ṭha lo thei hle tih a ni a, kan ngaina a nih pawhin hnimhnaih lutuk loh hi a ṭha ber awm e.

- RF. Zauva