Politics-a Kristiante mawhphurhna

Khawvela Kristian tam tak hian tun hma aṭangin Kohhran hi politics ah hian inrawlh ve lo tur a ngaih­na lian tak a nei a, kan inrawlh hreh hle thin bawk.

Mizoramah pawh Kohhran Upa, Pastor Pension adt te Politics khawvela an luh hian mipui rilru hi a dam zan lo ṭhin a, kan ram inrelbawlna chu Politician lo ni tawh sa te kutah kan dah ṭhin.

Tin, Rom 13 ah khan roreltute hi Pa­thian ruat an nih thu leh an thu thu a awm tur a tih kan nih thu kan hmu a, chuvang te pawh chu a ni maithei - Kohhran hian kan ram hruaitute langsar taka sawisel hi kan ti em em lo a, sorkar hi kan nawr ngai lem lo bawk. Mahse bawih ang maia roreltu dik lo te laka kun tur hian Pathianin min ko lo.

Charles Finney, evan­gelist ropui tak chuan kum 1800 vel khan Kohhran hi poli­tics-ah thil dik tak ti turin kut a thawh tur a ni tiin a sawi a. Politics chu rawngbawlna peng pakhat anga ngaih tur a nih thu leh, Pathian hnena ramin malsawmna leh anchhia a dawnna tur pawh hi Kohhran te’n ram rolrelnaah an inrawlh dan dik leh dik loah a innghat tih a sawi.

Politics-ah hian Pathian a inrawlh thukin a inrawlh hma hle. Pathianin Mosia hnenah Israel mipuite kaihruai turin dan (Thusawm Pek) a pe a. Numbers-ah pawh an aiawh thlang turin Pathianin Israel fate rem a ruat sak. Lalte II-ah hian rorletu ṭha leh sual inkar hlatzia kan hre thei bawk. Rorletu ṭha loin ram leh hnam a tihchhiat nasatzia kan hmu. Joespha leh Daniela te pawh ram inrelbawlnaah chanvo pawimawh tak an chelh tih kan hria.

Thuthlung Thar lamah pawh Lal Isua rawngbawlna kan hmu a, Lal Isua hian thlarau chauh chhandamna ni loin rilru, taksa, ram lerh hnam tana chhan­damna thlen turin khawvelah a lo kal a ni. Chuvangin, Kris­tiante hian politics-ah hian tihtur leh mawh­phurhna kan nei a ni.

Politics hi kan pum­pelh thei lo, chu chu Tirhkoh Paula pawh khan a hre chiang a. Timothea hnena lehkha a thawn vawi khatna 2:1-2 ah pawh khan lal ber leh thuneitu zawng zawng pawh ṭawngṭaisak turin min chah a nih kha. Sorkar hi dik taka a kal chuan khawvelah hian Pathian ram hlim­thla hi a din thei a ni.

Kristian kan nih anga kan mawhphurh­na hi kan ram rorel­naah kan hlen ṭha tawk lo a. Ram leh hnam tana roreltu nih hi Pathian ruat leh Pathian rawngbawlna a ni tih kan hriat chian a ngai. Krisrian ram kan nih angin Pathian hman theih ram hruaitu thlang turin i harh ang u. Thlarau chhandamna mai ni lo kan ram leh hnam chhandamna thlen tura thawk tur kan nihna te hi i ngaihtuah thar ang u.

Tun hun hi kan ram chhe mek kan siamṭhat theih hun a ni. Party candidate ni loin Pathian hmantlak tur candidate ram hruaitu atan i thlang ang u.

Lal Isua rawng­bawlna (holistic mi­ssion) chhun­zawm zel tura koh leh ruat kan nih angin kan ram hian tisa leh thlarua a chhamdamna a chan theih nan nang leh kei hi missionary pawimawh ber kan ni tih rilru pu-in MLA inthlan lo awm tur hi i hmachhawn ang u.

- Rinfela Zadeng