Sunday meeting-a tel loh
Vanglaini 15-6-2018 chhuak, phek khatnaa ‘Prime Minister-in NITI Aayog meeting Pathianni-ah a koh avangin ka kal dawn lo - Chief Minister Hawla’ tih kha ka lo chhiar ve a. Kan CM khan a ṭawng awm tak a ṭawng a tih theih.
Kan hma lawkah MLA thlan a ni tawh a, tuna taka khatia a ti kha a lehlam hian inthlan propaganda-ah an lo ngai hlauh ang em?! Central khuan Kristian tamna state kan ni a, Pathianni chu kan ni serh a ni tih pawh an hre vek a, chuvangin chawlhkar ni 7 awmna renga a Pathianni ber khera hetiang ram chhung state zawng zawngte telna tur meeting koh a hi chu hriat thiam a har deuh zawng a ni e.
Ka rilru te tein kan CM hian a kal loh tur thu hetia media hmaa a sawi hi official-in PM a hriattir ang em tih te mi ngaihtuah tir a.
Hetiang Pathianni kher khera thilpawimawh tih a ni ziah mai hi hmana hmanah khan lo do tawh awm hi kan ni a. BJP sorkar hnu phei chuan vawi duai lo Central Minister-te pawhin Pathianni kher kherin Mizoram tlawhin an lokal cham chi a, heng an lokal nikhuate pawh hian kan state sorkar lah hian ṭha takin a lo welcome zel ṭhin a. Tuna kan CM-in a duh loh ang hian hmana hmanah khan lo hnar fithla tawh chu ni se dan a dang deuh ngei ang.
Kan ṭhenawm state Kristian tamna, Meghalaya leh Nagaland-te pawh hi thurualpuiah sawm ni se, duh lo tlang se chu an thu pawh central beng a thleng na deuh awm e.
Central Service exam pawimawh te pawh Pathianni kher kherin neih a ni ṭhin. Tunah chuan hmun tam berah Inrinni pawh hi holiday a ni tawhin a lang a, chuvangin Pathianni kher lovah, Inrinni-ah emaw hetiang exam hi neih tura rawtnate pawh na deuhin thlen ni zawk sela a ṭha hle awm e. Central exam ang chi tam ber hi chu Pathianni a ni vek mai si a. Inchhuang takin secular state kan ni kan ti a, mah se hetiang a nih chhung chuan Kristiante tan chuan a secular lo em mai a! Kan ram hruaitute hian hma la vat teh se.
Kei ni mipuite pawhin kan sakhaw ni pawimawh kher khera meeting koh a nih a, kan hotute an tel lo ngam hi hrethiamin i lawm ang u. Tam tak chuan inchirhtheh nan hman kan tum leh mai thei. Mahse a bul thum tak hi hria ila, i ngaithiam teh ang u.
Hmanah pawh khan mi ṭhenkhat chuan kan state mamawh ngaihtuaha lokal an ni a, state pachhia kan nih avangin kan mamawh te lo thlen tur chuan lo welcome an ngaih thu an sawi
ṭhin. Kan sakhaw rinna tiderthawng tur leh kan sakhaw rinna tichhe tura kan sakhaw niserh ber khera lokal na na na chu engah nge kan sakhua aia kan lo ngaih pawimawh ang tih hi kan ngaihdan ni tlat se chu an sim hmak chuan a rinawm. Tun chinah chuan kan ni serha lokal te chu i lo welcome lo ngam tawh teh ang u.
NITI Aayog meeting Pathianni a neih tura kan tel lo ngam hi a ropui a, tun hnu leh zelah pawh kengkawh ang u. Mipui lam pawhin hetia a tel lo ngam hi fakin i lawm ang u. Kan sakhua leh kan rinna a ral mai loh nan huai takin ṭan i la sauh sauh teh ang u.
- Patrick Z, Chhingchhip