Hlauh hi...
Tun hnai chho chu hlauhnain Zoram a tuam a ni ber mai. Hlauhna hi sual a nih ka hre hranpa lo a, chutih rualin hlauhna kan hmachhawn dan erawhin kan hma lam hun thui tak a hrilin ka ring.
Khawvel ram ropui ber leh thil tithei ber US pawh hlauh neihah a bang chuang lo a, bang sang siam a tum ut ut a nih hi. Mizote pawh hian hlauh tam tak kan nei a- chim ral kan hlau a, kan Kristianna a boral a, kan khawtlang nun a danglam vek kan hlau a, hlauh tur dik tak zawng a ni ngei e.
Amaherawhchu, kan thil hlauh kan hmachhawn dan hian awmzia a neiin, rah ṭha chhuah tur a ni em? tih erawh zawhna lian tak a ni.
A theih chen chen inkharkhip a, in chhung lum aṭanga khawvel thlir a, kan duh dana nun hman a, kan hmel leh chi anpui te nen chauha kawppuia insiam a, kan Pathianin thu min chah ang ngeia inthlah pun dur dur a, he ram zim tea muk tana awm chu thil chakawm tak zawng a ni - kan thei te a nih ngai chuan. Mahse, vengtu ui huaisen tak anga mahni ramri veng ṭha, mahni ram china ring taka bauh tuar(h) tuar(h) thin nih hi kan chhunzawm reng thei ang emaw chu?
“Chhim chhak lam i thlir ang aw” tih ṭhin chu Pu Modi-a leh a sangawizawnpui ten “Chhim chhak lamah che tak tak ang aw” an rawn ti ta a. Kan duh emaw duh lo emaw, Mizoram pawh kan tel ve dawn. Chhim chhak ram leh a piah lam ram hawiin min hawng dar ngei dawn a, kan kawngkharpui kan khar phui tlat avanga him ta maia kan inngaih ngawt lai hian kan khar tel loh in hnung lam kawngkhar aṭang hian min rawn veh dawn khawp. Hlauh kan nei dawn rau rau a nih chuan kei chuan hengte hi ka hlau.
Kawng a ṭha ang a, sumdawnnain hma a sawn uak uak ang a, hna a tam dawn. Chutiang bawkin kan hlauh em em kan hmel anpui ni lo te nen kan kat nuk dawn. Chu chu kan pu Modi-a te hian kan inlakhranna rilru min paih sak a, Delhi tlang lama min pawh hnaih hret hret reng an tum a ni.
Rahul-a leh Anil-a te nena kan chen ho a ṭul hun a la thleng ang. Chu chu hlau ila, kan hlauhna hi hmang thiamin, chu hlauhna ngei chuan min phuarkhawm se la. Kan hnamah chiang ila, kan history leh ṭawng humhalhin, kan sakhua ngei pawh hi biak inah chauh ni lo kan nunah pawh chawi vul ila, tu’n nge min awp tak tak thei chuang ang? Juda ho-in an ṭawng leh history an vawn tlat a, an biak Pathian biak an thlahthlam duh loh chhung chu eng ram mahin an awp tak tak dawn lo tih kan chian em hi. Kei ni pawh anni ang kan ni lo bik ang em ni?
Hlau ila, mahse, ṭhenawmpa thaibawih, a ṭhiante bula pawr em em, in lama ṭi leh dui ang lo deuhin, kan ram chin piah lamah pawh ring taka bauh ngam turin inzirtir ang u. Ralmuang taka kan awm theih lai leh mitin mitangin min chim hma hian.
Ṭum khat Manipuri pain “In ralmuanna hi mut mai nan in hmang a” min ti hial!
- Vanlalhriatpuia Sailo Champhai, Vengsang