HNAM ROPUITE U, THO R'U LE

Pa inngaitlawm, thil chik mi, a lan dan mai chuan a hmanhmawh chang pawha hmanhmawh hmel pu lo, a chet phung en mai chuan cowboy ang mai a ni. Cowboy hovin nunna thapa puak ruk an phawi hmaa muang fan raiha an chet leh pistol an phawi hnua rang taka an chet dan nen hian ka tehkhin ṭhin, chu ka tehkhin chu midang ni lovin, 'Hnam ropuite u, tho r'u le,' tih lehkhabu ziaktu Lalhruaitluanga Chawngte hi a ni.

Hnam ropui te u, tho r'u le, tih lehkhabu hian ṭhalaite beng a verh a, a nei ve loten neih an chak. Phek 95 leka chhah a ni nain, chhiar a manhla hle.

Pi leh pute hun aṭanga vawiin ni thlengin he lehkha­buah hian a chuang a, hetianga lehkhabu ṭha hi hrileng avanga kan tawm tlawk tlawk lai leh kan mangan laia ziah leh tihchhuah a ni a, a tihchhuah aṭangin nitam la liam lo mah se, a darh zau tawh hle.

U Hruaitea hi lehkhabu ziah thiam a ni satliah lo, thuziak uluk mi a ni. He leh­khabu chhung thu pawh hi a uluk tih a hriat hle, A AW B a rem fuh em em te hi a hlu a ni. A tawn hriat leh mi dang kâ aṭanga a hriat pawh nise thil a chikin a chhinchhiah chiang ṭhin a, belhchian a dawl.

Hnam ropuite u, tho r'u le, tih aṭang hian lehkhabu ziak­tute, ziak mi kan tihte ngaihsan awmzia hi ka hre nawn fo ṭhin. A chhiartu lam pawhin lehkhabu ?ha kan tehna pakhat atan lehkhabu chhunga thuziak hian belh­chian a dawl em? Mizo ṭawng a ziah dan a dik em, a kuthnu a mâm em, tihte chik zel ila, a ziaktute pawhin ṭha lehzualin an ziak ang nga, lehkhabu ṭha, chhiar man hla, lei iaiawm loh lehkhabu a lo chhuak zel dawn a ni.

Hnam ropuite u, tho r'u le, tih kan chhiar aṭang hian hun kal tawha hnam ropuite sulhnu hre chungin ṭhangtharte hian an hnung zui hi kan tih atan a mawi a ni. Kan pi leh pute sulhnu hi a pawr lem lova, chhui zui chakawm tak tak tam tak a awm a, chhiar liam mai lovin an hnung zuitu nih kan tum tlat ava pawimawh em. He lehkhabuah hian kan chanchin, kan pi leh pute chanchin, min thlahtute sulhnu a awm a ni.

He lehkhabu ka chhiar aṭanga kan rilrua lo awm ṭhenkhat kan sawi ang. Kum 2021 hian chhiartute zingah lehkhabu ṭha thlan tur nise, chhiartute chanchin Hnam ropuite u, tho r'u le, tih hian dinhmun sang tak a luahin ka ring. Sawi vak aiin chhiar mai khan a nihna tur a chiang viau.

He lehkhabu ziaktu hi bai kan hmeh pui, chawhmeh tui hawp ve ṭhin, sahdah min lo ṭheh teh tih ṭawngkam man thiam Mizo tlangval ngei a nih avang hian a chhuanawm hle.

- Ramchhana Hmar Phuaibuang