Inthlan leh lawmluh

Inthlan a hnai a, party hrang hrangin chuti zat kan lawmlut, chumi khami chu kan lawmlut tih thawm an chhuah leh ta chuah chuah a. Kum li chhung kan reh vang vang hnuah a kum nganaah chuan kan inlawmlut leh lut lut ta mai a nih hi.

Hetia an inlawmluh kher chhan hi politician ṭhenkhat kan zawt ṭhin a, samkhai zet hian boruak siam nan a ṭangkai ve alawm, sawrkar thei tur hmuha mipuiin min hmuh hi a pawimawh an ti liam mai zel mai. Min chhan dan a rualkhai ṭhin avang hian a dik a nih ka ring. Sawrkar thei tur hmuha mipuiin an hmuh theihna atana image show nan tihna a nih ber tak chu!

Party pakhatin chumi zat kan lawmlut an ti a, party dangin dawt an lo tih sak a, khawi ber hi nge rin tura eng hi nge thu dik tih hi hriat a har ṭhin hle. A chang hi chuan mi pakhatin a suak vek kan ni a tih fo te kha min ti hre chhuak ṭhin. Mipui lah hi kan han pawn lang khawp a, party hruaitute thusawi a nih tawh phawt chuan a dik leh dik loh lam ngaihtuah lovin kan awih dual dual a. Rev. Thansiama thusawi nia an sawi, an sawi­chhawn fo ṭhin, “Kan pawnlanzia hi a thukin a thuk a ni,” tih hi a dik tulh tulh hian ka hre ṭhin.

Political Party tu pawh an ṭha vek, chhia an awm lo. Kan en tur lai leh kan lo teh vena tur nia ka hriat ve ṭhin dan chu a steering wheel vuantute hi a ni. Pastor rual pawh a chhungah chuang se, a driver a laktlak miau si loh chuan khama tlan liam tho hmabak motor ang deuh hi niin ka hria.

Sam ziakah chuan, “Ngai teh, chhûngril lamahte hian takna i duh ṭhin a,” tih kan hmu. Chhungril lama takna duhtu Pathian kan nei a. Chumi ringtute inti si hian tinge kan dazat viau lawi si, dawt leh thu puarpawleng mai maia min bum tumtu an lo awm chuan i hnualsuat ngam zel ang u. Tichuan, kan ram hi Lalpa’n a tidam leh ang.

- Zoramthlira